Тәртіп сақшыларына бір апта ішінде көлік шамдары мен айналарының қолды болғаны жайлы бірнеше шағым түскен. Қылмысты ашу үшін олар көліктер көп тоналған маңдарды назарға алып, сол жерлерде түнгі тексеріс жүргізіпті.
Елордалық Полиция департаментінің баспасөз қызметі хабарлағандай, сондай тексерістердің бірінде тәртіп сақшыларының көзіне түскен 35 жастағы астаналық тұрғын қылмыс үстінде қолға түсіпті. Оның пәтерінен қымбат көліктерге тиесілі 5 жұп шам, 18 бүйірлік айна мен түрлі аксессуарлар табылған. Сонымен қатар, күдіктіден 9 бейнекамера тәркіленіпті. Ер адам оларды қылмысын жасыру үшін оқиға орнынан жұлып алып кеткен екен.
Күдікті уақытша ұстау изоляторына жеткізілді. Полицейлер оның ең кемі 9 көлік ұрлығына қатысы бар болуы мүмкін екенін жоққа шығармайды және соған ұқсас басқа да қылмыстарға қатысының бар-жоғын анықтау үстінде. Тәртіп сақшылары құқыққа қайшы келетін осындай әрекеттерден зардап шеккен азаматтардың Нұр-Сұлтан қаласының Полиция департаментіне (Бейбітшілік,19) жүгінуін немесе 8 (7172) 71-61-07; 71-60-28 нөмірлеріне қоңырау шалуын не «102» нөмірі арқылы хабарласуын сұрайды.
Осы орайда олимпиада чемпионы Дмитрий Баландинге тиесілі көліктің айнасын ұрлады деген күдікке ілінген ер адамның Алматыда қолға түскенін естеріңізге сала кетейік.
Комментариев: 0