Жан түршігерлік жол апатынан зардап шеккендер қазіргі таңда ауруханада ем алуда. Дәрігерлердің айтуынша, олар бір науқастың оң аяғын кесуге мәжбүр болған. Апат болған күні ауруханаға 29 адам жеткізіліпті. Олардың он төртін дәрігерлер тиісті ем-шарадан кейін үйлеріне жіберген, ал әртүрлі жарақат алған 13 адамның үшеуі ауыр халде жан сақтау бөлімінде, сегізі травматология бөлімінде және тағы екеуі торакальді хирургия бөлімінде жатыр. Науқастардың барлығының жағдайы бірқалыпты.
Естеріңізге сала кетейік, үш автобустың қатысуымен болған жол апаты 26 наурыз күні елордада болған еді. Апатқа себепкер болған 301-бағыттағы автобустың жүргізушісі мен бір жолаушы апат орнында қаза тапты. Сол күні 53 жастағы қоғамдық көлік жүргізушісінің жұмысқа шықпас бұрын рейс алды тексерістен өткендігі және денсаулығына қатысты шағымның болмағаны белгілі болып отыр. Техникалық жағынан да көліктен еш мін табылмады. Оқиғаның жай-жапсары әлі де анықталып жатыр.
Комментариев: 0