Нөмірсіз мопедті тіркеу жолдары

Қазақстанда көлемі 50 текше сантиметрге дейінгі қозғалтқышы бар мопед тіркелмесе, АҚШ-та, атап айтқанда, Нью-Йорк штатында тіпті кіші кубты техника да нөмірмен жүруі керек, ал оны басқаратын адам жүргізуші куәлігін алуы қажет.

Жеткізу қызметінің қарқынды дамуы тіркелмеген мопедтің көбеюіне әкелді, ал олардың жүргізу стиліне, соның ішінде тротуарда жүруіне (алматылықтар үшін таныс жағдай, солай емес пе?) қатысты сұрақ қала тұрғындары мен шенеуніктер арасында жиі көтеріле бастады.

Бұрын мототехника сатушылары мопедті еркін сататын, ал көлікті тіркеу міндеті сатып алушыға жүктелетін еді. Енді жағдай түбегейлі өзгерді. Штат губернаторы Кэти Хокул мототехниканы тіркеуге дилерлер міндеттелетін заңға қол қойды. Яғни, клиент техниканы нөмірмен бірге сатып алады.

Заң мототехниканы тіркеумен шектеліп қана қоймады. Ол электрлі велосипед, электросамокат және т.б. жаңа көлік түрлерінің апат статистикасын жинауды ұйымдастыруды, осындай техниканы қауіпсіз пайдалануға қатысты онлайн ресурстарды іске қосуды, парамедикке арналған тренингтерді, жаяу жүргіншіні өткізу және бағдаршам сигналы сияқты жол ережесінің негізгі талаптары бар стикерді мопед пен электроскутерге жапсыруды және басқа да бастамаларды қамтиды.