«Яндекс» картасында бағдаршам көрсететін жүйені мамандар Digital Bridge 2025 форумында таныстырды. Жоба авторларының айтуынша мұндай шешім Қытай, Оңтүстік Корея және Ресейде бұрыннан бар, ал Қазақстанда пилоттық режимде биыл жазда Қостанайда, қыркүйекте Қарағандыда пайда болды.
Жаңа картадан жүргізушілер бағдаршамның түсін және ауысуына қанша уақыт қалғанын көре алады. Бұл бағытты алдын ала жоспарлауға мүмкіндік беріп, апаттың алдын алуға көмектеседі. Болашақта жүйе қиылыстан тоқтамай өту үшін оңтайлы жылдамдық ұсынып, кептелісті дәлірек болжауға жағдай жасайды.
«Мұндай жүйені Астанада қосса, көлік қозғалысын жаңа жол салмай-ақ жеңілдетуге болады. Елестетіңізші, көлік легі біркелкі жүреді, қиылыста кептеліп тұрмайды. Өмір қарқыны инфрақұрылымнан жылдам дамып келе жатқан елорда үшін интеллектуал бағдаршам сән емес, қажеттілік. Онымен тек әдемі емес, шынымен ыңғайлы әрі қауіпсіз қала жасауға болады», — деді урбанист Ерлан Сәкенов.
Осындай бағдаршамдар қалада тәртіп орнатуға көмектесе ме, қалай ойлайсыз?
Комментариев: 0