MotoGP жарысы Қазақстанда өтпеуі мүмкін

Биыл Гран-при болмауы мүмкін. 20–22 қыркүйекке жоспарланған жарыстың өтпейтіні туралы ресми ақпарат әлі жарияланған жоқ, бірақ Autosport басылымы кезеңнің тағдыры шешілгені туралы хабарлады.

Autosport өз дереккөзіне сілтеме жасап хабарлағандай, MotoGP күзде екінші рет Катарда болады. Елімізде өтетін кезеңнен бас тартудың себебі — Sokol International Racetrack трассасының уақытында дайын болмауы.

Соңғы айларда Dorna Sports өкілдері спорт нысанына бірнеше рет барып, жұмысты жылдамдатпақшы болған, бірақ сәтті аяқталмаған сияқты.

MotoGP сериясын ұйымдастырушы Dorna Sports, Халықаралық мотоспорт федерациясы (FIM) және мотожарыс командаларының халықаралық қауымдастығы (IRTA) жарыс өтпейтінін ресми түрде қашан жария ететінін Autosport басылымы нақтыламады.

MotoGP бірінші рет кейінге қалып отырған жоқ. Бастапқыда алғашқы жергілікті Гран-при былтыр шілдеде өтеді деп жоспарланған. Жарыстың өтпей қалуына трассадағы омологация жұмысы мен әлемдегі операциялық қиындық себеп болған. Биыл жарыс 14-16 маусымға жоспарланған, бірақ мамырдың басында ауа райы мен су тасқынына байланысты жарыс болмайды деген хабар тарады. Кейін ұйымдастырушылар чемпионатты 20-22 қыркүйекке ауыстырды.