«Москвич» төрт жаңа көлік шығарады

«Москвич» зауытының басшысы Ханс-Петер Мозер Мәскеу автомобиль құрастыру форумында кәсіпорынның жоспарын бөлісті. «Автопоток» телеграм-каналы Мозердің презентациясына сілтеме жасап, 2025 жылға дейін «Москвич 3-ке» тағы бес модель қосылады деп хабарлады. Сонымен қатар зауыт өндірісіне 2022 жылмен салыстырғанда бірқатар түзету енді.

Биыл «Москвич» барлық сипаттамасы белгілі, 6 индексті бір жаңа лифтбек шығарады. Бірақ бағасы әзірге құпия. Ханс-Петер Мозер лифтбектің төрт нұсқасы болатынын айтты.

2024 және 2025 жылдары кәсіпорын тағы төрт модель құрастырады. Зауыт басшысы алғашқы екеуінің индекстері 5 және 8 екенін айтып, басқа ешқандай ресми ақпарат бермеді. Дегенмен бұған дейін тараған сыбыстар арқылы болжам жасауға болады.

Мысалы, КамАЗ-дың директорлар кеңесінің отырысында «Москвич 5-ті» көрсетті. Ол нұсқасына байланысты 149 не 184 ат күшіне ие 1.5 литрлік турбомотормен жүретін JAC Sehol X6-ның көшірмесі. Ал Ресейде бірегей бренд атынан сатылып жүрген X7 индексті JAC «Москвич 8-ге» айналады деген болжам бар.

Татарстан басшысы Рустам Миннихановтың Қытайға сапарында «Москвич» болуы ықтимал тағы бір көлік анықталды. Бұл — 2 индексін иеленетін JAC S3 Pro жол талғамайтын көлігі. Модель Қазақстанда танымал, ал мәскеулік бренд топтамасында ең арзан машина болады.

Кәсіпорынның өндірістік жоспарын жаңа басшы екі есе қысқартты. Алғашқыда 2023 жылы «Москвич» шамамен 50 мың машина шығарады деп жоспарланса, қазір ол көрсеткіш 27 мың деп өзгерді. Соның 4.1 мың данасы ғана электрокар болады. 2024 жылдың күзінде зауыт өндіретін автомобиль саны 44 мыңға жетеді, бұған дейін 100 мың дана деп мәлімдеген еді. Сонымен қатар зауыт өндірісін кеңейтіп, ұсақ торапты әдіспен көлік құрастыруға көшеді, мамандар шанақ дәнекерлеп, бояйды.

Ханс-Петер Мозер Дмитрий Прониннің орнына биыл маусымда келген. Жаңа басшы Ресей автоөндірісінде КамАЗ-да 10 жыл қызмет еткен адам ретінде танымал, оның кезінде К5 жүк көлігінің жаңа буыны шықты.