Гонконгта ерекше нұсқадағы көне Mitsubishi Galant сатуға қойылды. Бұл нұсқа 1980 жылдардың соңында «Галанттың» раллиге қатысуына рұқсат алу үшін жасалған. Сол кездегі ережеге сәйкес, модель әлем чемпионатына қатысу үшін әдеттегі нарыққа арналған кемінде 5000 данасы шығуы керек болатын. Осылайша Lancer Evolution-ның арғы тегі саналатын VR-4 жарық көрді.
Бұл Galant VR-4 1992 жылы жасалған. Яғни, капот астына үлкенірек турбокомпрессоры бар мотор қойылған жаңарған седан. Екі литрлік 16 клапанды 4G63T бұрынғыдай 205 күш емес, 240 ат күшін береді. Барлық 303 Нм момент дөңгелектерге 5 сатылы механика мен толық жетекті жүйе арқылы беріледі.
Шанағындағы жарыс ливреясынан бөлек Galant VR-4-тің аспасы мен басқа да бірқатар компоненті жақсартылған. Көлікке иелік еткен азаматтардың бірі KYB тірегі мен Ultra Racing тірегіші бар тұрақтандырғыш орнатыпты. Стандарт дөңгелектің орнына OZ Racing дискісі қойылған, ал салонда классикалық Recaro Classic Artista креслосы бар.
Шыққанына 29 жыл болған Galant VR-4-тің одометрі 97.4 мың шақырымды көрсетіп тұр. Ал 2021 жылдың жазынан бері седан үш мың шақырым жол жүрген. Соңғы сервистік жазба 94 мың км жүрген соң пайда болыпты . Онда машинаның барлық жетек белдігі, сорғысы, тежегіш дискісі мен қалыбы (колодка) ауыстырылды, жаңа инжектор орнатылып, генераторы жөнделген.
Қазіргі иесі Galant VR-4-ті қаншаға сататыны белгісіз, бірақ седанды сатып алуға қызыққандар көп. «Галантқа» қазірдің өзінде 26 мың Аустралия доллары (8.1 млн теңге) ұсынылды. Аукцион осы аптаның соңында аяқталады. Айта кетерлігі, түпнұсқа орындық пен дөңгелек көлікпен бірге беріледі.
Комментариев: 0