Mercedes-Benz жаңарған S-Class-ты көрсетті

29 қаңтар кешінде рестайлингтен өткен W223 индексті Mercedes-Benz S-Class-тың тұсаукесері өтті. Модельдің сырт келбеті құпия емес, себебі премьераға бірнеше сағат қалғанда седанның суреті интернетте тарады. Енді жаңа өнім туралы толық ақпарат пайда болды.

Автомобиль фирмалық үш сәулелі жұлдызбен көмкерілген ірі радиатор торын алды. Осындай өрнек фара мен артқы шамда да кездеседі. Кейбір нарықта капот жиегінде логотипі жанатын нұсқасы болады.

1 / 9

Обновлённый S-Class представлен официально

Mercedes-Benz S 500 4MATIC AMG Line lang

1 / 9

Жаңа фара озық технологияға толы. Әрқайсысында 25 000 микро-LED модулі бар. Алысқа түсетін шам 600 метрге жарық шашады, ол қарсы бағытта және алдыда келе жатқан көлікке бөгет болмау үшін жарықты автоматты түрде реттейді. Фара жол бетіне әртүрлі проекция түсіріп, жол төсемі өзгеретінін немесе жол тарылатынын ескерте алады.

Интерьері Mercedes-тің басқа жаңа модельдерімен үйлеседі. Седан Hyperscreen панелін алды, бірақ EQS-тегідей үш экран бірікпеген. S-Class-та 12.3 дюймдік аспаптар панелі бөлек планшет ретінде тұр, оның артында ірі проекциялық дисплей тұр. Медиакешеннің сенсорлы экраны — 14.4 дюйм, жолаушыға арналған экран — 12.3 дюйм. Машина бейнеконференцияға арналған селфи-камералармен жабдықталған.

Ортаңғы консольге екі сымсыз қуаттағыш, жанатын стақан қойғыш және бейімді дефлекторлар жайғасты.

1 / 8

Мамандар MBUX операциялық жүйесінің соңғы нұсқасына ChatGPT4o нейрожелісіне негізделген виртуалды ассистент орнатты.

Жабдықтар тізіміне түрлі жылытқыш пен желдеткіш (соның ішінде жылытқышы бар қауіпсіздік белдігі), артқы жолаушыларға арналған 13.3 дюймдік экран, 39 динамикті аудиожүйе, бөлек артқы кресло, 150-ден астам шанақ түсі, 400 түрлі интерьер және жүргізуші ассистенттерінің жаңа кешені кіреді.

Мотор гаммасы 6 және 8 цилиндрлі агрегаттардан тұрады. Жаңа жазық иінді білігі бар 4 литрлік V8 қозғалтқышы M177 Evo индексіне ие. Қуаты 537 ат күшіне (750 Нм) тең. Ол 48 вольттық стартер-генераторлы жұмсақ гибрид. V8 орнатылған седан S580 индексімен шығады.

Цифрлық атауы ұқсас, бірақ «e» тіркемесі қосылған түрленім 3 литрлік алты цилиндрлі қозғалтқышқа негізделген қосылатын гибрид (PHEV) ретінде жұмыс істейді. Күштік құрылым 585 ат күші мен 750 Нм момент береді. Электр қуатымен жүріс қоры 103 шақырымға жетеді. Бренд S450e деп аталатын 435 ат күшіне ие қарапайым PHEV ұсынады.

1 / 5

Mercedes-Benz S 580 e 4MATIC with EQ Hybrid Technology AMG Line lang

1 / 5

Базалық нұсқалар — 3 литрлік бензинді турбомотормен жүретін S450 (381 а.к.) және S500 (449 а.к.). Еуропадағы клиенттер 313 немесе 367 ат күшін беретін 3 литрлік турбодизельге тапсырыс бере алады. Кейін топтамаға толыққанды AMG және сәнді Mercedes-Maybach қосылады.

Рестайлингтен өткен соң барлық S-Class толық басқарылатын шасси алады. Бірақ базалық көліктің артқы дөңгелегі небәрі 4.5 градусқа бұрылады, толық 10 градусқа дейінгі бұрылу амплитудасы үшін қосымша ақы төлеуге тура келеді.

Шасси бөлігіндегі басты жаңалық — бейімді аспаны арнайы технологиямен ұштастыратын iDamping жүйесі. Енді автомобиль жолдағы ақау туралы дерек жинап, серверге жүктейді. Бұл статистиканы басқа машиналар пайдаланып, аспаны жол жағдайына сай алдын ала баптай алады.

Жаңарған автомобильдің Еуропадағы бағасы 121 356 еуродан (72.8 млн теңге) басталады. Ол — Mercedes-Benz S 350 d 4MATIC.

Комментариев: 0