Mercedes-AMG GT электромобильге айналды

Mercedes-AMG GT-дің буыны алмасты, концепциясы өзгерді. Капот астында енді бензинді V8 жоқ. Машина барлық дөңгелекті айналдыратын электромотор көмегімен қозғалады.

Ұзындығы 5 метр, дөңгелек базасы 3 метр болатын жаңа Mercedes-AMG GT кейбір дизайн элементін AMG GT XX концептісінен алған және неміс маркасының қазіргі топтамасындағы көліктерден ерекше. Дегенмен жарық техникасындағы үш сәулелі жұлдыздар қалыпты.

1 / 13

Mercedes-AMG GT 63

1 / 13

Интерьерде үш үлкен дисплейден тұратын фирмалық панель бірден көзге түседі, алайда олар тұтас әйнекпен жабылмаған. Ортаңғы экран жүргізушіге қарай бұрылған. Салонда физикалық батырмалар аз, бірақ ортаңғы консольде жүріс электроникасын баптайтын үш шайба тұр. Автомобиль күңгірттелетін және AMG логотипін проекциялайтын электрофотохромды әйнектен жасалған панорамалы шатырмен жабдықталған.

1 / 9

Mercedes-AMG GT 63

1 / 9

AMG GT үш электромоторы бар жаңа AMG.EA платформасына негізделген. Оның екеуі артқа, біреуі алдыңғы оське жайғасты. Компания бастапқыда клиенттерге GT55 және GT63 нұсқаларын ұсынады. Біріншісінің қуаты 816 ат күшіне тең, екіншісінің агрегаттары 1169 ат күшін береді. Қозғалтқыштар 106 киловаттық батареядан қуат алады, машина 700 шақырым жүреді.

63 индексті үздік Mercedes-AMG GT алғашқы жүздікті 2.4 секундта, екіншісін 6.8 секундта еңсереді. Салмағы 2.5 тонна.

Купе белсенді AMG Active Ride Control аспасын, жылжымалы антиқанат пен диффузордан тұратын Aerokinetics аэродинамикалық элементтерін алады. Соның арқасында кедергі коэффициенті өте төмен (0.22). Модельдің тағы бір ерекшелігі — AMG Force S+ режиміндегі V8-дің дыбысын шығаратын жүйе.

Жаңа Mercedes-AMG GT-дің бағасы әзірге белгісіз, көлік дилерлік орталықтарға 2026 жылдың аяғында жетеді.

Комментариев: 0