Мемлекет басшысы Қасым-Жомарт Тоқаев жуырда мас күйінде көлік жүргізгендерге қолданылатын жазаны қатаңдатуды тапсырған болатын. Беларусь тәжірибесіне сүйенген ІІМ бұрын мас күйде көлік жүргізгені үшін жүргізуші куәлігінен айырылғандардың көлік құралын тәркілеу мәселесін қарастыруда.
Мас күйде екінші рет ұсталдың ба — көлігіңмен қоштас! Қайта ереже бұзғандар қатаң жазаланады. Алайда, бұл мәселеде құқықтық қайшылықтар да жоқ емес. Мысалы, көлік бірнеше адамға тиесілі немесе кінәлі азаматтың иелігінде мүлде болмаса ше?
Әзірше бұл сұрақтардың жауабы жоқ. Десе де Беларусь елінің тәжірибесін зерттесек, қатал жазаның аса тиімді болмағанын аңғаруға болады. Бұл елдің азаматтары мас күйде көлік тізгіндеуін әлі жалғастыруда. Ал Тоқаевтың тапсырмасы орындалғанда не боларын уақыт көрсетеді.
Беларусьтегі мас жүргізушілер қазір қандай жазаға тартылады?
Егер алғаш ұсталса — ел азаматы 50-100 базалық көрсеткіш (~250 000−500 000 теңге) көлемінде айыппұл төлейді және жүргізуші куәлігінен қағылады. Егер бір жыл ішінде қайта қолға түссе — қылмыстық жауапкершілікке тартылып, көлік маскүнемге тиесілі болмаса да тәркіленеді, ереже бұзушы бес жылға жүргізу құқығынан айырылады және екі жылға дейін қоғамдық жұмыстарға тартылады не 1 000 базалық көрсеткіш (~5 000 000 теңге) көлемінде айыппұл төлеп, екі жылға бас бостандығы шектеледі не екі жылға бас бостандығынан айырылады.
Комментариев: 0