Елден ерек жобаларымен танымал Mansory ательесі BMW-ның флагманын алғаш рет жақсартып көрді. Шеберлер әзірше карбон бастырықты ғана көрсеткенмен, интерьерін кәдімгідей өзгертеміз деп отыр. Болашақта модельдің күштік агрегаты да Mansory мамандарының көзіне түсуі мүмкін.
Алдыңғы бөлігі қаптамаға толы. Бампер стандарт қалпын сақтағанмен, ірі сплиттердің арқасында дизайны біршама өзгерді. Радиатор торы да жаңа сияқты, капотта ірі контраст ендірме тұр.
Жаңа табалдырық пен дөңгелек аркасын орнатқандықтан, BMW XM жалпақ көрінеді. Артқы бөлігіне үлкен диффузор, жүксалғыш есігінің ортасына шағын спойлер, үстіне жақсарған антиқанат қойыпты.
Тюнерлер дөңгелек дискісін өзгерткенін айтты, бірақ суреттен жол саңылауы кішірейгені де байқалады. Mansory әдеттегідей бастырықтың бағасын атамады.
BMW XM 4.4 литрлік V8 бен элетромотордан тұратын гибрид күштік құрылыммен жүреді. Агрегаттың ең мықтысы 748 ат күші мен 1000 Нм момент береді. Ателье оның қуатын арттыру амалын табуы әбден мүмкін. Өйткені қарашада бірден 78 күш қосқан Mercedes-AMG S 63 E Performance моделін таныстырған болатын.
Комментариев: 0