Былтыр қарашада BMW дизайны оғаш көрінетін XM концептісін көрсеткен, бір жылдай уақыт өткенде онша өзгермеген сериялы нұсқасын жұрт назарына ұсынды. Машина ірі радиатор торын да, екі деңгейлі оптикасын да сақтап қалыпты.
Автомобиль марканың кроссоверлер топтамасында бәрінен жоғары тұр. Ұзындығы — 5110 мм, ені — 2005 мм, биіктігі — 1755 мм. Дөңгелек базасының көлемі жеті орынды X7 моделінікі сияқты 3105 мм болғанымен, бұл көлікке бес-ақ адам сыяды. Салмағы — 2750 кг.
Салонында таңғалатын ештеңе жоқ. Жүргізуші алдына екі дисплейден тұратын комбинация орнатыпты, біреуі аспаптар панелі қызметін атқарса, екіншісі мультимедиа мен борт жүйелеріне жауапты. Кешенді iDrive 8 операциялық жүйесімен басқарады. Мұның бәрін біз BMW X7-ден көргенбіз, тек автомат қораптың селекторы басқаша. Инженерлер бұл жолы дәстүрлі иінтіректі қалдырған. Сонымен қатар салонды қаптаған винтажды қоңыр былғары көз тартады.
BMW XM-нің барлық нұсқасы — қосуға болатын гибрид (PHEV). Мұнда негізгі күштік құрылым 490 «арғымағы» бар 4.4 литрлік V8 (S68) турбомоторы. Ол 8 сатылы автоматпен және 197 күшке ие электромотормен жұмыс істейді. Соның арқасында 653 ат күші мен 800 Нм беретін XM алғашқы жүздікті 4.3 секундта алады. Ең жоғары жылдамдығы – 250 км, M Driver пакетімен сағатына 270 шақырым жол жүре алады. Ал электрлі режимде жүріс қоры 48 шақырымға жетеді.
Марка мамандары 2023 жылдың ортасына қарай XM-нің саны шектеулі сериясы шығатынын айтты. Label Red деп аталатын айрықша түрленім 735 ат күші мен 1000 Нм момент береді.
BMW XM өндірісі жыл аяғында марканың АҚШ-тағы зауытында басталады. Автомобильдің ең арзанын 159 мың долларға аласыз, ал Label Red үшін кем дегенде 185 мың доллар санап беруге тура келеді.
Комментариев: 0