Li Auto Қазақстанға ресми түрде келуді жоспарлап отыр. Бұл туралы «Китайские автомобили» басылымының дереккөзі хабарлады. Олардың мәліметінше алғашқы автосалон биыл ашылады.
Бренд жергілікті компаниямен қарым-қатынас орнатпай, өз өкілдігі арқылы тікелей сатуды жоспарлап отыр. Дереккөздер стартап кейбір модельге сертификат алуды бастап кеткенін айтады, бірақ қай модельдер екені нақтыланбаған. Li Auto ресми түрде алғаш Астанаға келеді.
Компания негізінен тізбекті гибрид кроссоверлерімен танымал. Топтамада толыққанды электрокар біреу ғана — үлкен Mega вэн, дәл осы модельмен экспортқа шықпақшы. Өйткені Қытайда Mega моделі компания басшылары күткендей сатылмады. Олар айына шамамен 8 мың электровэн өтеді деп күткен, алайда сәуірде небәрі мыңға жуығы саудаланды.
Осы жағдайға байланысты компания Mega моделінің ішкі нарықтағы бағасын төмендетіп қана қоймай, екінші электрокар шығаруды кейінге шегерді және жылдық жоспарын қайта қарады. Бренд бастапқыда биыл сауда көлемі 800 мың автомобиль болады деп жоспарлаған болса, қазір бұл көрсеткіш 640 мыңға түсті. Жоспарланған нәтижеге қол жеткізуге экспорт көмектесуі керек. Li Auto Таяу Шығысқа шығуға дайындалып жатыр, келесі меже Орталық Азия болады.
Комментариев: 0