Алматыдағы Li Auto жеке сервис орталығы марканың Қытайдан тыс жерде ашқан осындай типтегі алғашқы кәсіпорны болмақ. Cnevpost компаниядағы дереккөзіне сілтеме жасап хабарлағандай, Қазақстанда Li Auto сервисіне сұраныс инвестиция құюға жеткілікті болған. Орталық шілдеде ресми ашылады.
Li Auto Қазақстандағы автомобиль саны мың данадан асты, сол үшін арнайы сервис орталығы қажет деп санайды. Компания тіке басқаратын орталық қазір сынақ режимінде жұмыс істеп тұр, бірнеше аптадан кейін ресми жұмыс бастайды.
Li Auto Орта Азия мен Таяу Шығыста осындай орталықтар желісін ашуды жоспарлап отыр. Мысалы, Дубайда қазір техникалық мамандарды іріктеу жүріп жатыр. Компанияның Қытайдан тыс жерде жаңа автомобиль сататын орталығы жоқ, бренд негізінен ішкі нарыққа жұмыс істеп жатыр, ал шетелге машиналарын жекелей жеткізеді.
Li Auto биыл төртінші тоқсанда экспортқа ресми өнім шығаруды жоспарлап отыр. Алдымен L7 және L9 ірі гибрид кроссовері шетел нарығына шығуы мүмкін, баға әр елдің жергілікті ерекшелігіне байланысты әртүрлі болады.
Бренд биыл жыл аяғына дейін Қазақстан нарығына ресми аяқ басады деген ақпарат бар. Мамырда Li Auto бірнеше моделіне сертификат алуға және Астанада алғашқы автосалонын ашуға дайындалып жатқаны белгілі болған. Сол кезде дереккөз марка жергілікті серіктес іздемейтінін, өнімін өз өкілдігі арқылы тікелей сататынын хабарлаған. Қазақстанға бейресми жолмен келген Li Auto көліктері жақсы өтіп жатқандықтан, компания біздің елге назар аударып отыр.
Комментариев: 0