АҚШ жұрты Lexus LS 400-ді game changer, яғни «ойын ережесін өзгертуші» деп атады. Өйткені 80 жылдары Cadillac пен Lincoln басшылары немістің Mercedes-Benz және BMW маркаларымен бәсекелесіп, әлек болып жатқанда, қымбат көліктер сегментіне жапон бренді аяқ басқан еді. Нәтижесінде LS 400 нарықтағы жағдайды адам танымастай өзгертті.
Табысы мол сегмент өкілі болатын жеңіл көлік жасау жұмысын Toyota 1983 жылы бастады. Компания сол деңгейдегі Century моделін құрастырып, тәжірибе жинаған, бірақ ол жергілікті тұрғындарға арналды, әрі аздап шығарылатын, ал енді таңдау мүмкіндігі жоғары америкалық клиенттің көңілінен шығу керек болды.
Компания «мерседес» пен БМВ өнімдерін негізге алды. Сондықтан сырт пішіні ғана емес, сапасы да неміс стандартына сай машина жасауды мақсат етті.
1986 жылы темір тұлпардың болжамды нобайы сызылды. Жобалау барысында мамандар көліктің 450 үлгісі мен 900 күштік құрылым прототипін жасады. Салон қаптауда қолданылатын ағаш пен былғары таңдаудың өзіне шеберлер екі жылын сарп еткен. Барынша мінсіз көлік құрастыруды көздеген компания ең озық дүниелерді қолдануға тырысты, сондықтан көлікке 250 ат күші мен 353 Нм момент беретін 32 клапанды 4 литрлік жаңа V8 орнатылды. Агрегат 4 сатылы автоматпен жұмыс істейді. Екі иінтіректі тәуелсіз аспасы бар шасси қосымша пневматикалық элементтермен жабдықталды. Машина сағатына 100 шақырым жылдамдықта қозғалғанда салондағы шу деңгейі 58 дБ-ден аспайтын, бұл сол сегменттегі ең жақсы көрсеткіш еді, Rolls-Royce пен Bentley-ді есепке алмағанда, әрине. Айта кетерлігі, автомобильге отын шығыны тым жоғары болғаны үшін салық салынбады.
Алты жыл тынбай еңбек етіп, миллиардтаған доллар жұмсаған компания 1989 жылы Детройт автосалонында LS 400-ді таныстырды. Lexus маркасының алғашқы өкілі жұрт назарын аударып, көп басылымның сынағынан өтті және жоғары бағаланды. Сол жылы қыркүйекте АҚШ-та сатыла бастаған модель артынша Аустралия, Канада және Ұлыбритания нарығына шықты. Сол уақыт аралығында Toyota Celsior атауымен өз отанында саудаланған оң рөлді LS 400 Жапонияда жыл көлігі атанды.
Қазақстанға Lexus LS 400 90 жылдардың ортасына қарай келді. Жергілікті халық маркадағы кереметті көрмеді, сол себепті бірінші буындағы LS иесі атанғандардың қарасы көп болмады, қазір де сатылымда жоқтың қасы. Toyota өнімдері бұрыннан пайда көзі ретінде қаралады, алайда тарихи мәні бар LS 400 мұнда коллекциялық көліктер қатарына қосыла алмады.
Комментариев: 0