Lamborghini 2000 ат күші бар көлік шығара ма?

Volkswagen Group-тың баспасөз конференциясында концерннің бас директоры Оливер Блюм Lamborghini-дің алғашқы электромобилі көрмедегі батареялы Lanzador кроссоверіне ұқсайтынын растады.

Жаңа өнім 980 вольттық платформаға негізделеді. Оны Porsche, Audi және Bentley сияқты премиум брендтер де қолданады. Бұл архитектураның арқасында қуаты 2000 ат күшіне артып, жылдам қуаттау функциясы пайда болады және жүріс қоры ұзаққа жетеді. Lanzador-дың 2023 жылы жазда өткен презентациясында оның күштік құрылымы кем дегенде 1 мегаватт немесе 1341 ат күшін беретіні айтылған. Стандарт көлік 2000 ат күшіне ие болмаса да, мұндай көрсеткішке Performante нұсқасы жетуі әбден мүмкін.

Блюм бұл электромобиль Lamborghini-дің негізгі зауыты — Сант-Агата-Болоньезеде шығатынын растады, бірақ аккумулятор сияқты күштік құрылым компоненттері қайда жасалатыны туралы нақты ақпарат берген жоқ. Ол тек «Бұл эмоция сыйлайтын қарапайым Lamborghini болатынына уәде беремін», — деді.

Lamborghini электрокар ұсынуға асығып отырған жоқ. Бұл модель 2028 жылы жарық көруі ықтимал. Бұған бірнеше себеп бар: біріншіден, электромобильге қызығушылық төмендеуі, екіншіден, Lamborghini биыл шығатын Ferrari-дің электрлі көлігі қалай сатылатынын зерттемекші. Бұл бәсекелесінің кем тұстарын есепке алып, машинаны клиенттер үшін анағұрлым тартымды етуге мүмкіндік береді.