Бұған дейін полицейлердің Қостанай тұрғыны Серік Малдыбаевты 7 жылға жүргізуші куәлігінен айырғанын жазған едік. Оқиға барысы былай болған: тәртіп сақшылары тұрғынның мас екенін біле тұра машинасын басқа жерге қоюды талап еткен, азамат рөлге отырғанда полицейлер оны мас күйде көлік жүргізді деп айыптап, хаттама толтырған.
Жүргізуші Қостанай облыстық сотына шағым түсірді. Малдыбаевты прокурор да қолдады. Оқиға орнындағы бейнежазбаны зерттеген сот өкілі жүргізушінің машинаны жүргізбес бұрын төрт минут қыздырғанын, осы уақыт ішінде полицейлер оны бақылап тұрғанын атап өтті. Сотта қаралған қызметтік бейнежетон жазбаасынан патрульдер жүргізушінің жағдайын білгені байқалады — ол қызметтік көлікте біршама уақыт отырыпты, сол кезде тәртіп сақшылары одан алкоголь иісін сезген.
Бейнежетон жазбасында «Машинаны алып таста», «Одан иіс шығып тұр», «Бірақ түрінен байқалмайды», «Иә, байқалмайды», «Машинаны алып таста дедің бе?», «Иә, әрі қой дедім» деген сөздер бар.
Нәтижесінде облыстық соттың апелляциялық алқасы Қостанай қаласы Әкімшілік құқық бұзушылықтар жөніндегі мамандандырылған сот шығарған қаулының күшін жойды.
«Полицейлердің әрекеті қызмет мүддесіне және өздері қызмет ететін халықтың мүддесіне қайшы. Олар ереже бұзуға жасанды түрде жағдай жасаған. Сондықтан сот Малдыбаевтың әрекетін әкімшілік құқық бұзушылық деп тани алмайды. Істе құқық бұзушылықтың субъективті жағы жоқ, себебі әрекет полиция қызметкерінің заңсыз бұйрығын орындау үшін жасалған. Соған сай әкімшілік құқық бұзушылық құрамы жоқ. Сот Малдыбаевқа оның ақталуға құқығы бар екенін түсіндіреді», — деп жазылған жаңа қаулыда. Судья арандатушыларға қатысты жеке қаулы шығарды ма, жоқ па, белгісіз.
Енді бес тәулік қамауда отырған әрі жүргізуші куәлігінен заңсыз айырылған тұрғын тәртіп сақшыларынан моральдық және материалдық шығынын өтеуді талап ете алады.
Комментариев: 0