Қостанай полициясы: «Құқық бұзушылықтың алдын алуға міндетті емеспіз»

Қостанай тұрғыны Серік Малдыбаев инспекторларға қарсы талап-арыз жолдады. Нalyqstan.kz интернет-паблигі хабарлағандай, ол полицияның қасақана әрекетінің құрбаны болғанын дәлелдеді.

Оқиға көршілердің заңсыз тұрған машинаға қатысты шағымынан кейін патрульдің көп қабатты үйдің ауласына баруынан басталған. Әкімшілік хаттама толтырған соң қызметкерлер көлік иесінен техниканы басқа жерге қоюды талап еткен.

Малдыбаев көлігін қардан тазартып, басқа жерге қойған. Дәл сол сәтте патрульдің бірі оған медициналық тексерістен өтуді ұсынған. Себебі ер адамнан алкоголь иісі шығып тұрыпты. Сараптама нәтижесі жүргізуші ішімдік ішкенін көрсетті. Полиция оған мас күйде көлік жүргізгені үшін тағы бір хаттама толтырып, істі сотқа жолдаған. Салдарынан ер адам 15 тәулікке қамалып, 7 жылға жүргізуші куәлігінен айырылды.

Қостанай тұрғыны 5 тәулік абақтыда отырып, кейін Қостанай облыстық сотына жолданған арыз қаралғанға дейін уақытша босатылған.

Сотта Малдыбаев пен оның адвокаты бұны арандату деді. Себебі құзырлы орган өкілдері көлік орнынан қозғалмай тұрып-ақ алкоголь иісін сезіп, азаматтың мас екенін білген. Ер адам үйінде болғанын, бір бөтелке сыра ішкенін, бірақ рөлге отыруға ниеті болмағанын айтты. Ол машинамен 20 метр жүруге полицейлер мәжбүрледі және мені қайта жазалағысы келді деді. Жүргізуші өзін полиция құрығына түскен құрбан санайды.

Прокурор Малдыбаевты қолдады. Оқиға орнындағы бейнежазбаны зерттеген сот өкілі жүргізушінің машинаны жүргізбес бұрын 4 минут қыздырғанын, осы уақыт ішінде полицейлер оны бақылап тұрғанын атап өтті.

Олар Малдыбаевты рөлге күштеп отырғызбадық, жүргізуші машинаны басқа жерге қоюға көмектесуді сұраса, бас тартпас едік деді. Тәртіп сақшылары құқық бұзушылықтың алдын алуға емес, тек оны тіркеуге міндеттіміз деді.

Сот істі қарап жатыр. Тәртіп сақшысы заңнаманы қаншалықты жақсы білетіні белгісіз.

«Қазақстан Республикасының ішкі істер органдары туралы» заңның 6-бабы 1-тармағының 4-тармақшасына сәйкес полиция өз құзыреті шегінде құқық бұзушылықтың алдын алу бойынша жалпы, арнайы және жеке профилактикалық шаралар жүргізуге міндетті. 30-тармақшада полиция қылмыстық құқық бұзу фактісін анықтау, алдын алу, жолын кесу және ашуға, оның ішінде жедел іздестіру шараларын жүргізуге міндетті деп жазылған.