Әлемдегі ең элиталы машинаны шығаратын автоөндіруші былтырғы сатылым нәтижесін жариялады. 2021 жылы 5586 жаңа Rolls-Royce иесін тапқан. Бұл 2020 жылмен салыстырғанда 49 %-ға жоғары. Марка негізінен АҚШ, Қытай және Еуропаға сатылды. Ең танымал модель — Cullinan кроссовері.
Rolls-Royce бас директоры Торстен Мюллер-Отвос Financial Times газетіне сұхбат беріп, сатылым мөлшері неге мұнша артқанын түсіндірді. Оның айтуынша, бір күні күтпеген жерден ажал жетсе, ақшасы бекер қалатынын ойлаған адамдар қымбат машина мініп, баяшат өмір сүруге ұмтылуда, сол үшін сатылым бір жарым есе өсті.
Өйткені мұндай өте қымбат машинаны сатып ала алатын адамдардың көбі орта жастан асқандар. Коронавирус індеті жастарға қарағанда егде жастағы кісілерге қауіпті екенін ескерсек, Торстен мырзаның болжамы ақылға қонымды секілді.
Ал нарық сарапшылары премиум санаттағы автоөндірушілердің дағдарыс кезінде көп зардап шекпегенін басқаша түсіндіреді. Олардың айтуынша, аз данамен шығатын қымбат автомобиль өндірушілер қазір тапшы боп жатқан микрочипті аз пайдаланады. Ал миллиондап машина өндіретін қатардағы автоөндірушілерге өте көп микрочип керек.
Комментариев: 0