Көлікті қайта өңдеуге бергенде елімізде шыққан жаңа автомобиль сатып алуға жеңілдік сертификатын да алуға болады. Экология министрлігі өкілдерінің айтуынша жеңілдік сертификатының құны әлі белгісіз. Керексіз көлікті ақшаға сатып алу процесін нарықтық қатынасқа көшіру жоспарда бар. Бағаны сатып алушылар ұсынады.
Автомобильді утилизацияға өткізудің барлық кезеңі министрлік әзірлеген жобадағы жаңа қабылдау ережесінде көрсетіледі. Құжатқа сәйкес, көлік иелері машинаны утилизацияға жіберу өтінішін ақпараттық жүйенің мобильді нұсқасы арқылы тапсыруға тиіс. Өтініш беруші қайта өңдеуге жіберілетін автомобильдің қолданыстан шыққанын растайтын суретін нақты уақыт режимінде қоса беруі керек.
Ол үшін мыналар болуы шарт:
Қандай құжаттар керек
Көлік иесі өтінішке электронды цифрлы қолтаңбамен қол қояды. Сол үшін ақпараттық жүйені eGov mobile-мен біріктіреді. Өтінішпен мыналар қоса берілуге тиіс:
Жеке тұлға
1) жеке басын куәландыратын құжаттың көшірмесі;
2) көлік тіркеуден шыққаны туралы анықтаманың көшірмесі;
3) көлікті алғанда иесі некеде болса, жұбайының нотариус куәландырған келісімі, сондай-ақ неке туралы куәліктің нотариус куәландырған көшірмесі және жеке куәліктің көшірмесі;
4) көлікті алғанда иесі некеде болмаса, нотариус куәландырған өтініш.
Заңды тұлға
1) көлікті тапсыруға уәкілетті тұлғаның жеке басын куәландыратын құжаттың көшірмесі;
2) eGov.kz порталынан алған заңды тұлғаны тiркеу (қайта тiркеу) туралы анықтама (күнтiзбелiк 10 күннен ерте берілгені жарамайды);
3) заңды тұлғаның бірінші басшысы мен бас бухгалтері қол қойған тұлғаның көлікті беруге өкілеттігін растайтын сенімхаттың көшірмесі;
4) машинаны есептен шығару туралы анықтама.
Электронды өтініш үш күн ішінде қаралады. Кейін техниканы қайта өңдеуге қабылдау немесе қабылдамау туралы шешім қабылданады.
Өтініш қабылданды. Ары қарай не болады?
Үкімет бұған дейін уәде еткендей, ескі көліктерді монополистер емес, бірнеше жеке кәсіпорын қабылдайды. Оларға қойылатын талаптар жаңа ереженің жеке тармақтарында көрсетілген.
Өтініш қабылданған жағдайда ақшалай өтемақы алғысы келетін көлік иесі бір жұмыс күнінен кешіктірмей ақпараттық жүйеде баға ұсыныстарына сұрау салып, керексіз көлігіне ең жақсы баға ұсынған сатып алушымен сатып алу-сату келісімшартын жасауы қажет.
Елімізде шыққан жаңа автокөлік сатып алуға жеңілдік сертификатын алғысы келсе, машинаны қабылдау пунктіне өзі жеткізіп, тапсыруы керек.
Бұл әзірге жоба ғана, қарастыру барысында шарттар өзгеруі мүмкін.
Комментариев: 0