Көлікті күнде пайдалану электрлі фуралардың көшбасшысын анықтады

NACFE (Солтүстік Америкалық жүк тасымалы тиімділігі кеңесі) әртүрлі өндіруші шығарған 22 электрлі жүк көлігінің жұмысын тексерді. Компания бірнеше жылдан бері жұмыс істеп келе жатқан Run on Less бағдарламасы аясында 18 күн бойы әр машинаның жүру қашықтығы, жүктеме деңгейі, қуаттау инфрақұрылымының жұмысын бақылады. Меншік құны мен өзге көрсеткіштер де ескерілді.

Соңғы нәтиже бойынша Tesla Semi үздік болып шықты. PepsiCo автопаркінің жүк көліктері орташа есеппен күнделікті 644 км жүріп, 45 минутта 80 %-ке дейін қуатталған. Электрлі тартқыштардың бірі 924 шақырым жол жүрді деп жазды InsideEVs, ал рекордық көрсеткіштің авторы — «Семи». Автомобиль бір күнде 1732 шақырымды алқымдап, үш рет қуатталған.

Үздік нәтижеге Nikola Tre (410 км), Freightliner eCascadia (291 км) және Volvo VNR Electric (282 км) жақындай түсті.

PepsiCo халық арасында тараған NACFE мәліметтеріне түсініктеме беріп, олардың жүк көліктерінің 60%-і километрі 32,6 тоннадан астам толық жүктемемен жүргенін атап өтті. Бұл осы класқа жататын машинаға рұқсат етілген көрсеткішке (37.2 тонна) барынша жақын екен.

Run on Less күнделікті пайдалану кезінде жүк көлігінің 750 кВт суперчарджерлер арқылы қуатталу мүмкіндігі паспортта көрсетілген жүру қашықтығынан әлдеқайда маңызды деген тұжырымға келді. Жедел қуаттау станцияларының болуы аймақтық бағыттарда ықшам, жеңіл және арзан аккумуляторлары бар көліктерді пайдалануға мүмкіндік береді, бұл жүк тасымалдау құнына оң әсер етеді.

Адамдардың көбі сынақ нәтижелерін мұқият қадағалайды, өйткені АҚШ-та жеке компаниялар мен мемлекеттік ұйымдар үшін біртіндеп федералды Advanced Clean Fleets шектеулері күшіне еніп жатыр. Оған сәйкес қоршаған ортаға зияны жоқ көліктердің үлесі компания паркінің 50%-ін құрауға тиіс.