Кәсіпорынды Allur Group директорлар кеңесінің төрағасы Андрей Лаврентьевтің Qarmet компаниясы (бұрынғы Arcelor Mittal) сатып алды.
«Курсив» хабарлағандай, зауыт 4.1 миллиард теңгеге бағаланды. Зауыт ғимараты мен жабдықтары жеке лоттармен сатылған. Алдымен мемлекеттік органдарға ұсынылды, кейін электрондық саудаға шыққан.
Қарағанды облысында 2017 жылы іске қосылған бұл зауыт қолданыстан шыққан машинаны қайта өңдеумен айналысқан. RecyclingCompany компаниясына тиесілі болды, ал құрылтайшысы басқа жеке компания — Green Future Management Ltd. Жалғыз иесі — Әлия Назарбаева.
Кәсіпорын 2021 жылдың желтоқсанына дейін ескі көліктерді сатып алып, қайта өңдеген. Сол кезде компания ескі және апатты жағдайдағы автомобильді утилизацияға қабылдауды тоқтатып, 2022 жылдың 5 қаңтарынан бастап жаңа бағаға сатып аламыз деп уәде еткен. Бірақ қаңтар оқиғасы басталып, жаппай толқулардан кейін утиль алымын қабылдаумен және металды қайта өңдеумен айналысқан «ӨКМ операторы» жұмысын тоқтатты.
ӨКМ-нің міндеті мемлекетке, яғни Экология министрлігіне қарасты «Жасыл Даму» компаниясына өтті. Компания «ӨКМ Операторының» құжаттарын қабылдай бастағанын және 2022 жылы ақпанда ескі автомобиль сатып алуды жалғастыратынын хабарлады, бірақ кейінірек бұл бағыттағы жұмыс тоқтағанын және ескі автомобиль үшін өтемақы төлеу тек «Оператордың» қызметіне қатысты тергеу аяқталғаннан кейін басталатынын мәлімдеді.
2022 жылдың қаңтарында ӨКМ-нің кейбір басшысы және Экология вице-министрі Ахметжан Пірімқұлов 13 млрд теңгеден астам қаржы жымқырды деген айыппен қамалды. Алайда ескі машина қабылдау ісі басталмады. RecyclingCompany зауытының қызметіне тыйым салынып, екі жылға тұрып қалды.
Енді зауыт жұмысын жалғастырады деген үміт бар. Бұған дейін Экология министрлігі ескі техниканы кәдеген жаратудың жаңа ережесін әзірлеген, оған қоса кәсіпорынның жаңа иесі пайда болды.
Комментариев: 0