Көлік құрылымының қауіпсіздігі туралы куәлікті беру тәртібі қандай?

Елге келген автомобильге көлік құралы құрылымының қауіпсіздігі туралы куәлік алу мүмкін болмай тұрғанын импорттаушылар Kolesa.kz-ке қарашада хабарлаған. Біз бұл сұраққа жауап іздеп, Алматыдағы және облыстардағы сертификат беретін бірнеше зертханаға хабарластық, олар деректер базасы үш аптадан бері істемей тұрғанын, сол үшін аталған куәлік берілмейтінін айтты.

Тек Ақтөбедегі бір мекеме редакцияға деректер базасы қарашаның басында жаңарды, зертханалар енді жаңа жүйемен және жаңа тәртіппен жұмыс істеуі керек деді.

Жаңарған базадағы басты өзгеріс — онда жеке тұлғаға машинаны өзі пайдалану мақсатында тіркеген кезде көлік құралы құрылымының қауіпсіздігі туралы куәлік берілгені әрі сол азаматтың атына бір жыл ішінде басқа автомобильге куәлік берілмейтіні жазылады.

Алайда сертификат беретін орталықтар Сауда және интеграция министрлігінің Техникалық реттеу және метрология комитетінен жаңа базаға қатысты ешқандай түсініктеме алмапты. Олар жаңа жүйені өздері зерттеп түсінуге тиіс болған. Бұл көбінің қолынан келмеген сияқты, сол себепті олар импорттаушыларға база істемей тұр деген.

Содан кейін редакция Техникалық реттеу және метрология комитетіне хабарласты, олар аталған куәлік беріліп жатыр деп мәлімдеді. Бірақ жаңа жүйе бойынша жұмыс істеп тұр. Бұрын сертификат «Е-терезе» ақпарат жүйесінде тіркелсе, биыл 8 қарашадан бастап функция «Е-КТРМ» ақпарат жүйесіне көшті.

Комитет процесс қалай жүзеге асатынын түсіндірді.

ГОСТ 33670-2015 бойынша автомобильді тексерістен өткізу фото және видеожазбамен қатар жүруі керек. Ал сынақ хаттамасында (немесе қосымшада) автомобильдің сынақтан өткенін нақты растайтын фотосурет болуы қажет. Міндетті түрде арнайы құрылғыда немесе жол сынағы арқылы тежеуіш ​​жүйесін, шу және зиян газ шығару деңгейін тексеру қажет. Нәтижесі фотосуретпен бірге ақпараттық жүйеге жүктелуге тиіс.

Бірақ көбі бұл талапты орындамаған. Комитет машинаны стендте сынақтан өткізбеу, зиян газ бен шу деңгейін тексермеу секілді көптеген заңсыз әрекетті анықтапты. Тіпті кейбір көлікті сынақ зертханасына әкелмей, уақытша сақтау қоймасында тұрған жерінен бағалаған. Мұндай жолмен 8–14 қараша аралығында Қазақстанда 1600-ге жуық сертификат беріліпті.

Бұл жыл сайынғы техникалық тексерістен өту процесіне өте ұқсайды!

«Осыған байланысты комитет форматты-логикалық бақылау енгізу туралы шешім шығарды. Ол 2024 жылғы 15 қарашада күшіне еніп, 3 желтоқсанға дейін 5673 көлік құралы құрылымының қауіпсіздігі туралы куәлікті тіркеу жөніндегі өтінішті қарадық, оның 1613-ін (28.4 %) қайта қарауға жіберіп, 4060-ына (71.5 %) қатысты оң шешім шығардық. Жаңа тексеріс жүйесі күшіне енген алғашқы екі күнде түскен 450 өтінімнің 400-ін қайта қарауға жібердік, тек 50-і оң статус алды, осыдан кейін зертханалар көлік құралын шынайы сынақтан өткізе бастады», — деді жауапты мекеме өкілдері.

Кейбір зертхана куәлікті неге бере алмай жатқанын комитет түсіндіре алмады, дегенмен олар әлеуметтік желіде қызметкерлерді жаңа жүйемен жұмыс істеуге үйрететін арнайы топтар құрылғанын атап өтті.

Қазіргі жағдай 2023 жылдың басында Қазақстан қағаз түріндегі куәлікті электронды нұсқаға көшірген кездегіге өте ұқсас. Ол кезде де кейбір сынақ зертханасы деректер базасы қолайсыз екенін айтып, ақпараттық жүйеде жұмыс істегісі келмеді. Түсіндіру жұмыстарынан кейін қағаз түріндегі куәлікке қайта оралу мүмкін емес екенін түсініп, куәлікті онлайн жүйе арқылы бере бастаған.

Бұл берілген куәлік реестріндегі үшінші база екенін айта кеткен жөн! Шенділер неге бар ресурсты жаңарта салмай, жаңасын жасайтыны түсініксіз.