100 индексті Toyota Land Cruiser Қазақстанда өте танымал. Қазір Kolesa.kz-те модельдің 600 данасы сатылып жатыр (арасында 105-тер бар). Оның көбі бірнеше жүз мың шақырым жол жүрген. Бірақ кейде «өмірінің» көп бөлігін гаражда өткізген ерекше экземпляр кездесіп қалады. Соның бірі Ақтауда тұр.
Хабарландыру авторы 2005 жылы шыққан қара Land Cruiser 100 20 жылға жуық уақытта алты мың шақырымнан сәл ғана көп жол жүрген деп жазыпты. Яғни жол талғамайтын көлікті жаңа деуге болады. Машинаның экстерьері де, былғарымен қапталған салоны да жаңа екенін көрсетіп тұр. Иесі автомобильдің жағдайы мінсіз екенін әрі ұсақ тастан қорғайтын пленкамен қапталғанын атап өтті.
Хабарландыруда жол талғамайтын көлік туралы өзге мәлімет жоқ. Тек оны өте сирек пайдаланған екен.
LC 100 2UZ-FE индексті 4.7 литрлік V8 моторымен жүреді. Мұндай агрегат 231 ат күші мен 410 Нм момент береді. Ол 5 сатылы автомат қорап және толық жетекті жүйемен жұмыс істейді.
Иесі машинаны 33 млн теңгеге бағалап отыр. Toyota 2.7 литрлік мотормен жүретін 7 орынды жаңа Land Cruiser 250-ді (Prado) дәл осындай бағаға (32.5 млн теңге) сатады. Ал 2.8 литрлік дизельді турбомотормен жүретін нұсқасы бұдан сәл қымбат (34.5 млн теңге) тұрады. Ақтаудағы «жүздік» бұл буынның ең қымбат экземпляры емес. 16.4 мың км жол жүрген, жақсарған 105 үшін иесі 40 млн теңге сұрап отыр.
Комментариев: 0