Италияда үкімет Жол ережесіне өзгеріс енгізу барысында 85 жасқа толған жүргізушілерге қатысты үш түрлі шектеу енгізуді көздеген. Егер бұл ұсыныс бекітілсе, егде жастағы кісілерге жоғары қарқынды трассаға шығуға, үйінен 100 шақырымнан артық ұзап кетуге тыйым салынар еді. Сондай-ақ олардың алкоголь ішіп рөлге отыруына мүлде тыйым салынып, қандағы алкоголь мөлшерінің аз-көптігі есепке алынбайтын еді.
Ішкі саяси пікірталас барысында көлік министрі Маттео Сальвинидің талабымен бұл шектеулер ережеге енбей қалды. Оның орнына министрлік егде жастағы жүргізушілер медициналық тексерістен мұқият өтуге тиіс екенін айтты деп жазды Carscoops. Мұндай азаматтар жүргізуші куәлігін жаңарту үшін теориялық емес, практикалық емтиханды қайта тапсыруы мүмкін.
Көптеген ел жасы ұлғайған жүргізушілердің денсаулығы мен ақыл-ой қабілетін бақылауды күшейтеді, мұндай тәжірибе Қазақстан да бар. Елімізде 2014 жылдан бері 65 жастан асқан жүргізуші екі жыл сайын медициналық тексерістен өтуі керек деген ереже бар. Ал биыл 25 тамызда күшіне енген «Жол қозғалысы туралы» заңның жаңа нұсқасына сай медициналық қарсы көрсетілімі бар егде жастағы жүргізушіні көлік басқару құқығынан айыру рәсімі жеңілдеді. Сол мақсатта Денсаулық сақтау министрлігі мен Ішкі істер министрлігінің дерекқоры бірігеді. Енді 65 жастан асқан жүргізуші № 073/у формалы медициналық анықтамасын уақытында жаңартпаса, куәлігінің күші уақытша жойылады.
Бірақ 65 жасқа толған бетте емханаға барудың қажеті жоқ. Қазір жүргізуші куәлігі бар адам алғашқы міндетті медициналық тексерістен 67 жасқа толған соң өтеді. Ал бұл анықтама екі жылға жарамды, демек келесі тексерістен 69 жасқа толғанда өтеді.
Комментариев: 0