Hyundai жаңа сутекті Nexo кроссоверін таныстырды

Hyundai жаңа буындағы сутекті Nexo-ның алғашқы суреттерін жариялады. Сериялық модель былтыр күзде ел алдына шыққан Initium концептісінің көшірмесіне айналғанымен, Hyundai интерьердегі радикал шешімдерден бас тартқан. Кейбір техникалық сипаттамасы белгілі, бірақ саудаға шығатын күн әлі нақтыланбады.

Жаңа өнімнің қырлы пішіні брендтің басқа кроссоверлерін еске түсіреді, бірақ бампердегі пиксельді блоктары бар жарық техникасымен және көлденең күндізгі жүріс шамымен ерекшеленеді. Артқы шамдары да ұқсас стильде жасалған.

Nexo-ның артқы тіректердің пішіні өзгеше, бесінші есік дәстүрлі спойлермен және әйнектен жасалған элементпен жабдықталған. Боялмаған пластиктен жасалған бастырықтың арқасында сұсты көрінеді.

Интерьері қарапайым, экран мен сенсорлы панельге толы. Негізгі блок 12.3 дюймдік бірнеше дисплейден тұрады, жанында бүйіріндегі артқы көрініс камераларына арналған кішігірім экрандар бар. Бөлек тұрған шағын сенсорлы экранмен климаттық жүйені реттеуге болады. Сутекті көліктің жабдықтар тізіміне алдыңғы әйнекке түсетін проекция, 14 Bang & Olufsen динамигі, екі сымсыз қуаттағыш және цифрлық артқы көрініс айнасы кіреді.

Hyundai Nexo-ның 204 ат күшіне ие бір электромоторы 110 киловаттық отын элементімен және 2.64 кВт⋅сағ батареямен жұптаса жұмыс істейді. Онымен автомобиль алғашқы жүздікті 7.8 секундта еңсереді, жүріс қоры 700 шақырымға жетеді. Электрохимиялық процестер үшін сутек сыйымдылығы 6.7 кг бакта сақталады, оны толтыруға небәрі бес минут қажет.

Hyundai жаңа Nexo-ны нарыққа шығару стратегиясын әлі жария еткен жоқ, алдағы бірнеше айда мәлімет беруі мүмкін.