Hyundai Ресейге орала ма?

Korea Economic TV компания ішіндегі инсайдері берген мәліметке сүйеніп, Hyundai Motor басшылары Санкт-Петербург қаласындағы көлік құрастыратын кәсіпорынды қайта алу мүмкіндігін қарастырып жатыр, себебі келісімшарт бойынша желтоқсанда опцион мерзімі өтеді деп жазды.

Брендтің уысынан шығып кеткен зауытқа қайта көз салуына Америка нарығындағы мүшкіл жағдайы себеп болған сияқты. Трамп билікке келгелі импорт салығы артып, біраз өндіруші тығырыққа тірелді. 2022 жылға дейін кәрістер үшін ең көп табыс әкелетін нарықтардың бірі Ресей еді.

Сыбыс расталса, қазір АГР холдингінің меншігіндегі мекемені қайта іске қосудың қажеті болмайды, өйткені ол соғыс басталмай тұрып жиналған бөлшектерден Solaris маркалы Hyundai және Kia көліктерін шығарып жатыр. Бұл модельдерге әлі де сұраныс жоғары.

2023 жылы компания сол кезде 207 млн долларға бағаланған мүлкін Ресейге небәрі 100 долларға беріп, елден кетуге мәжбүр болды. Қайта сатып алу шарттарына сәйкес марка өндіріс орнын қазіргі құнына алуға тиіс.