Hyundai Ioniq 5 көлігін тізгіндеген Флорида тұрғыны Майк Маккормик I4 тасжолымен кетіп бара жатып тежеуіш педалін күрт басқанда артқы орындықтың шынтақ тіреуішінде тұрған жарты литрлік бөтелке құлап, сымдарға су шашырап кетіпті.
Бірнеше минуттан кейін Маккормик аспаптар панелінде бірнеше ескертпе шам жыпылықтай бастағанын байқаған. Артынша бұрылыс шамы істемей қалып, кейін ол үйіне жеткенде электромобильді өшіре алмапты. Келесі күні Ioniq 5 «кірпішке» айналды.
2023 жылғы «айоникті» тексерген Hyundai дилері еден мен орындық астындағы сымдарды ауыстыру қажет деді. Ол үшін салонды толық бөлшектеу керек. Бұл зауыттық ақау болмағандықтан, иесінің қалтасы 11 882 долларға жұқарады.
State Farm сақтандыру компаниясы өтемақы төлеуден бас тартты, өйткені олар электр сымдарын бірден емес, біртіндеп тот басқан. Процесс ұзаққа созылады, сондықтан иесі өзі күресуі керек, бұл сақтандыру жағдайына жатпайды.
Майктың басынан өткен жағдайды баяндаған WFTV Channel 9 арнасы көрерменге таза энергия тұтынатын машина күтпеген сәтте шығынға батыруы мүмкін екенін ескертті.
Комментариев: 0