Hyundai 135 мың Santa Fe-ні сервиске шақырады

Hyundai Америкадағы 2024–2025 жылдары шыққан бесінші буындағы 135 386 Santa Fe кроссоверін тексеріп, қажет болса жөндеу үшін сервиске шақырды. Олар белгілі бір жағдайда отқа орануы мүмкін. Өйткені көліктің күштік құрылымын құрастырған кезде қате кеткен.

Былтыр күзде АҚШ-тың жол қауіпсіздігі басқармасы Hyundai Santa Fe-ні краш-тесттен өткізген. Сынақ кезінде кроссовердің қозғалтқыш бөлігінен түтін шығыпты. NHTSA бұл ақпаратты автоөндірушіге берді, Hyundai компания ішінде тергеу жүргізді.

Бірнеше айға созылған тексерістен кейін компания техника қысқа тұйықталу салдарынан түтіндеген деген қорытындыға келді. Ол стартердің бір қысқышы (клеммасы) мен салқындату жүйесінің желдеткіш блогы жанасқанда туындаған. Соғылған кезде дұрыс орнатылмаған клемма қақпағы құлап, желдеткіш блогына тиеді. Hyundai егер қақпақ дұрыс орнатылса, ешқандай қауіп жоқ деп мәлімдеді.

Бірақ марка қысқа тұйықталу және жол апатынан кейін машинаның мотор бөлігінде өрт шығу қаупі бар екенін ескеріп, 135 мыңнан аса кроссоверді сервиске шақыруды шешті. Компания мұндай кемшілік небәрі 1 % автомобильде бар деп санайды, бірақ сақтық үшін барлық Santa Fe-ні тексереді.