Росстандарт хабарлағандай, 2018 жылдың қараша айынан бастап осы күнге дейін сатылған 113 Toyota Highlander кері қайтарылады екен. Мұның себебі адам шошитындай ақау емес көрінеді. Дистрибьютор "қателесіп«,тұманға қарсы галогенді шамдардың орнына жарықдиодты шамдар орнатып қойыпты. Ал ондай көліктерді Toyota сертификаттамаған. Көлік құралының типін мақұлдауда тұманға қарсы LED шамдар жайлы мәлімет жоқ. Заң тұрғысынан компанияға автокөліктерді не қайта сертификаттау қажет, не кері қайтару керек. Олар кері қайтаруды жөн санапты.
Енді «Тойота» иелерін қымбат шамдарды арзанына ауыстыру үшін қызмет көрсету орталықтарына шақырып жатыр. Жол талғамайтын 113 көліктің иелері мұндай қадамға бара ма, жоқ па, ол жағы белгісіз. Бұл әрекет нәтиже бермеуі де мүмкін.
Шамдарды тексеру және ауыстыру жұмыстарының тегін жасалатынын айта кеткен жөн. Аталған қызметке жүгінуге тиіс көліктердің VIN-кодтарының тізімімен сілтеме арқылы танысуға болады.
Қазақстанда мұндай Highlander көліктерінің қаншасы сатылғаны белгісіз. Қазақстанда өткен жылы жалпы саны 352 темір тұлпар иесін тапқан, бұл Camry-мен салыстырғанда 14 есе, Toyota Land Cruiser Prado-мен салыстырғанда 6 есе төмен көрсеткіш. Біздің елде үш жиынтықта ұсынылатын көліктің бағасы 18 150 000 теңгеден 21 660 000 теңгеге дейінгі соманы құрайды.
Комментариев: 0