Грекия тұрғындары құлаған көпірмен жүріп жүр

2023 жылы күзде Ливия мен Еуропаның оңтүстік-шығысындағы бірқатар елді жойқын «Даниэль» дауылы шарпыған. Зардап шеккен мемлекеттердің қатарында Грекия да болды. Табиғи апат салдарынан елде 79 көпір қирады, соның бірі — Лариса қаласының маңында орналасқан, суретте көрсетілген көпір.

Көпірдің орталық бөлігі су деңгейіне дейін шөгіп кеткен. Бірақ жергілікті тұрғындар, тіпті кейде навигациялық қосымшаларға сеніп жолға шыққан туристер де Пиньос өзенінен осы көпір арқылы өтіп жүр.

Жергілікті LarissaNet басылымы хабарлағандай, бүлінген көпір маңында ешқандай физикалық бөгет немесе қоршау жоқ, тек жолдың қауіпті екенін ескертетін жол белгісі орнатылған. Ал қираған көпірді айналып өту үшін басқа трассамен бірнеше шақырым жол жүруге тура келеді. Сондықтан асығыс жүргізушілер уақыт үнемдеу үшін басын қатерге тігіп, осы көпірден өтеді.