Geely Smart Charging қуаттау станциясы рекорд жасады

Жыл басында BYD концерні 1500 кВт-қа дейін қуат бере алатын Flash Charging технологиясын таныстырған. Енді оған лайықты бәсекелес табылды. Ол — қуаты 2250 кВт-қа жететін Geely Smart Charging интеллектуалды жүйесі.

Жаңа станция 800–1500 вольтты архитектураға негізделген электромобильдерге арналған. Ол күн панелі, энергия жинақтағыш және чарджерден тұратын бірыңғай контур қағидаты бойынша жасалған.

Станцияны сынақтан өткізген кезде Lynk & Co 10 және Zeekr 001 электромобилінің қуаты 10-нан 70 %-ға дейін — 4 минут 30 секундта, 10-нан 97 %-ға дейін 8 минут 40 секундта толды. Салыстыру үшін айтсақ, Flash Charging аккумуляторды 10-нан 70 %-ға дейін — бес минутта, 10-нан 97 %-ға дейін тоғыз минутта қуаттайды.

Smart Charging жүйесінің ішкі процесін Starwise PowerMind нейрожелісі басқарады, ол аккумулятордың күйін, қоршаған ортаның температурасын және өзге параметрлерді бақылайды. Басқару алгоритмі қызу температурасын 65 °C-тан асырмай ұстап тұрады, орташа температура 55 °C-тан төмен болады.

Geely Қытайда ауқымды желі құруды жоспарлап отыр: 2027 жылдың аяғына дейін елде 22 мың бекет пайда болады, оның 15 мыңы Smart Charging кешенімен жабдықталады. Компанияның әлем нарығына арналған стратегиялық мақсаты — күніне 12 млн электрокарға қызмет көрсететін 600 мың порты бар экожүйе құру.

Қазір Қытайда бұл салада BYD көш бастап тұр. Концерн өз еліне 10 мыңнан аса Flash Charging станциясын орнатып үлгерген, жыл аяғына дейін санын 20 мыңға жеткізуді жоспарлап отыр.

Айтпақшы, BYD мен Geely-ге тағы бір компания бәсекелес болады. Sunwoda мегаваттық станциясын дайындады. Бұл жүйе батареяны 10-нан 70 %-ға дейін — бес минутта, 10-нан 97 %-ға дейін тоғыз минутта толтырады. Компания 2027 жылдың аяғына дейін Қытайда 10 мың станциядан тұратын желі құрады.