Ford-тың құтты болсын айтуға келмейтін мерейтойы

Ford машинаны іске қосқан кезде цифрлық аспаптар панелінде пайда болатын ақауға байланысты АҚШ-та 355 656 пикапты кері шақырды. Көліктің спидометрі мен шұғыл тежеу шырағы көрінбей қалған.

Алғашқы шағым қаңтарда түскен. Маусымның аяғына дейін олардың саны 96-ға жетті. Ең жақсысы, Visteon жасаған аспаптар панелінен шыққан ақауға байланысты оқыс оқиға тіркелген жоқ.

2025 жылғы F-150 топтамасы мен одан үлкен F-250, F-350, F-450, F-550 модельдерінен кемшілік табылып отыр. Бұлар Америка нарығында аса танымал. Машина иелері ешқайда бармайды: мамандар проблеманы бағдарламаны қашықтан жаңарту арқылы шешеді.

Биыл Ford машиналарынан рекордтық деңгейде ақау табылды: қаңтардан бері марка 105 сервистік кампания жариялаған, жыл аяғына дейін көрсеткіш артуы мүмкін! БАҚ таратқан ақпаратқа сүйенсек, Ford кері шақырған көлік саны FCA, Volkswagen, GM, Mercedes, Honda және Hyundai-ні қоса есептегеннен де көп.