Ford-тың Еуропадағы бөлімшесі мұндай шараға баруға дайын екенін ресми түрде мәлімдеді. 2027 жылға дейін компания шамамен 4 мың қызметкерінен айырылады, ал 2025 жылдың басында Explorer және Capri электромобильдерінің өндірісі қысқарады. Ford Еуроодақ билігінен және Германиядан қолдау сұрады.
Ford бұл шешімін соңғы жылдардағы шығын мен электромобильге болжамды және нақты сұраныс әртүрлі болғандықтан осындай шара қажет деп түсіндірді. Қайта құрылымдау компанияның бәсекеге қабілеттілігін арттырып, қиын кезеңнен өтуге көмектеседі.
Компания бірінші Германиядағы, сондай-ақ Ұлыбритания филиалындағы қызметкерлерін жұмыстан шығарады. Жақында жарық көрген Explorer және Capri электромобильдерін жасай бастаған Кёльндегі кәсіпорында ауысым қысқарады. Ford бұл зауытты электромобиль өндіретін флагмандық кәсіпорынға айналдыру үшін 2 миллиард доллар жұмсаған.
Брендтің қаржы директоры Джон Лоулер компания зиянды шығарындыны азайту саясатын қолдайтынын, бірақ электрокар индустриясы биліктің клиенттерге субсидия қайтару арқылы оларды ынталандыру, қуаттау станциясының инфрақұрылымына инвестиция салу және өндірушілерді қолдау сияқты басқа шараларына мұқтаж екенін айтты. Лоулер Еуроодақты автоөнеркәсіпті зиянды шығарындыны азайтуға мәжбүрлегенде алдымен жағдайды ескеруге шақырды.
Ford-тың Еуропадағы бөлімшесі іштен жанатын қозғалтқыш пен гибрид күштік құрылымы бар көлікті экологиялық стандартты сақтай отырып, жергілікті нарықта сата беретінін хабарлады.
Комментариев: 0