Ford басшысы Қытай пикаптарын сынап көрді

Қытай көліктерінің жанкүйері әрі Ford компаниясының бас директоры Джим Фарли Аустралияға іссапармен барғанда аспан асты елінің пикаптарын жүргізіп көріп, пікірін айтты.

Үш күн бойы орта өлшемді BYD Shark 6 мен GWM Cannon Alpha-ны тізгіндеген Ford-тың бас директоры олар Америка мен Жапонияның бір кластағы жүк көліктерімен бақталаса алады деді.

Drive басылымы Фарлидің Shark пикап болғанмен, 500 кг жүк тиегенде Ranger немесе Hilux-пен бәсекелес болмайды деген сөзін келтірді. Топ-менеджер бұл өнім осы шанақ түрін таңдайтын, бірақ ауыр зат тасымайтын немесе тіркеме сүйремейтін клиенттерге арналған деді.

Фарлидің айтуынша бренд инженерлері BYD Shark 6-ны бөлшектеп, оның қалай жасалғанын зерттеген, бірақ Қытай компаниясы бұл модельден қалай пайда табатынын әлі түсінбепті.

Фарли Ford және Toyota сияқты компаниялардың сенімді әрі ұзаққа шыдайтын көлік өндіруде тәжірибесі мол, сондықтан олар алдыңғы қатардан көрінеді деп санайды. Ол Қытайдағы әріптестерінің бұл салада білімі мен тәжірибесі аз екенін атап өтті.