Еуропротокол бойынша төлем кешігіп жатыр. Неге?

Жол апатын рәсімдеген кезде зардап шеккен тарап сақтандыру бойынша төлемді 15 күн ішінде алуы керек, бұл заң талабы. Полиция шақырмай, еуропротокол арқылы өтініш берген жағдайда, 100 АЕК-ке (369 200 теңге) дейін сақтандыру сомасын үш жұмыс күні ішінде алады. Мобильді қосымшада өтініш бергенде қате жіберсе, төлем алу мерзімі кешігуі мүмкін.

«Евразия» сақтандыру компаниясы Kolesa. kz редакциясына жол апатын рәсімдеудің жаңа оңай жүйесімен жұмыс істеу тәжірибесі туралы мәлімет берді. Жол-көлік оқиғасын рәсімдеуді жеңілдету үшін Europrotocol қосымшасында суреттердің мазмұны мен сапасына қойылатын талапты қамтитын нұсқаулар бар. Жол апатына түскендер нұсқауға қарай бермейді және көбінесе көліктің маркасын, моделін және мемлекеттік нөмірін анықтауға келмейтін суреттер жібереді.

Негізгі қателер:

1. Сапасыз суреттер — тұнық емес, нысан фокусқа кірмеген немесе жарық жоқ жерде түскен.
2. Нөмірі жоқ көліктің суреті — шүберек іліп қойған немесе алдын ала шешіп тастаған.
3. VIN-кодтың суреті жоқ, дәлірек айтсақ VIN-код орнына көлік құралын тіркеу куәлігінің (техпаспорт) фотосын жүктейді. Мұндай суреттер қабылданбайды. Зауытта жапсырған тақтайшадағы кодтың суреті керек. Ол автомобиль өндірушісі мен нарығына байланысты әр модельде әртүрлі жерде: капот астында, алдыңғы әйнектің астында, жүргізуші есігінің тірегінде, еден төсемінің астында немесе рамада орналасады.

1 / 4

• 
• 
• 
• 

1 / 4

Келіп түскен суреттердің шамамен 10 %-ы еуропротоколдағы критерийлерге сәйкес келмейді.

Жол-көлік оқиғасына қатысушылар апаттың мән-жайын дұрыс көрсетпейді.

Дерек толтырған кезде жиі кететін қателер:

1. Кінәлі мен зардап шегушінің статусын шатастырады.
2. Оқиға болған орынның мекенжайын дұрыс немесе толық толтырмайды.
3. Зақым сипатын және тізімін қате көрсетеді.

Жүргізушілерге мынадай кеңес бере аламыз: өтініш толтырғанда мұқият болыңыз. Нұсқауларды орындаңыз, асықпаңыз, сақтандырушыны алдауға тырыспасаңыз, ақшаңызды уақытында аласыз.

Бұған дейін Қаржы нарығын реттеу және дамыту агенттігі Kolesa. kz редакциясына биыл алғашқы үш айда жаңа схема бойынша сақтандыру төлемін алуға жүргізушілер 1906 өтініш бергенін, 1445 жүргізуші өтемақы алғанын хабарлаған. Сақтандырушылар 15 жағдайда төлем жасаудан бас тартқан, ал қалғандары бойынша жол-көлік оқиғасына қатысушылар растайтын құжат жинап жатыр.