Сақтандыру және бағалы қағаздар нарығын дамыту туралы заң жобасын қараған депутаттар адам зардап шекпеген жол апаты болған жағдайда сақтандыру ақысын алу процесін жеңілдетуді ұсынды. Олардың ойынша, бұл процедураны жылдамдатып, көлік иелерінің өмірін жеңілдетеді. Ұсынылған нормалардың маңызы мен қажеттігін атап өткен мәжіліс спикері Нұрлан Ниғматулин жүргізушілер қазір де әр мекеменің табалдырығын тоздырмай, мәселені өзара шешуге тырысатынын айтты. Енді арадағы келісім заң аясында іске асады.
Түзетулер заң жобасына екінші оқылымнан кейін енгізіледі. Одан бөлек сақтандыру заңнамасына міндетті автосақтандыру құнын бейімді тарифке ауыстыру ұсынылды. Дәлірек айтқанда, жүргізуші ереже бұзса, әрекеті құжатқа тіркеледі. Жылдамдықты шамадан тыс асырған азамат класы төмен сақтандыру алады және ол шамын өшіруді ұмытқан жүргізушіден көбірек ақша төлейді.
Халық қалаулылары қойған сұрақтарға жауап берген полицейлер ақпараттық жүйені жетілдіріп, сақтандырушылар базасымен біріктіруге дайын екендерін жеткізді. Нәтижесінде жаңа заң нормалары 2023 жылға қарай әзірленетін болды.
Жол апатын еуропротокол бойынша рәсімдеу қазір әлемнің көп елінде қолданылады. Ресейде бұл норма 2009 жылы күшіне енген. Сақтандыру ақысын мынадай жағдайларда тез алуға болады:
- жол апатынан адам зардап шекпесе;
- ЖКО тек екі көліктің қатысуымен болса;
- апатқа ұшыраған көліктер ғана зақымдалса;
- жүргізушілерде жарамды сақтандыру полисі болса;
- автомобильдерге келген зиян максимал сақтандыру сомасынан жоғары болмаса;
- екі жүргізуші де ЖКО-ны полиция шақырмай-ақ рәсімдеуге келісім берсе.
Комментариев: 0