Қазақстандағы еуропротокол. Алғашқы нәтиже

Қазақстан тұрғындары 2024 жылдың 1 қаңтарынан бастап еуропротокол бойынша, яғни жеңіл жол апатын полиция шақырмай-ақ рәсімдей алады. Kolesa.kz редакциясына Қаржы нарығын реттеу және дамыту агенттігі хабарлағандай, жоба іске қосылғаннан бері үш айда оңай схемамен сақтандыру төлемі бойынша 1906 өтініш берілген және 1445 жүргізуші өтемақы алды. Сақтандырушылар 15 жағдайда төлем жасаудан бас тартқан, ал қалғандары бойынша жол-көлік оқиғасына қатысушылар растайтын құжаттар жинап жатыр.

Қаржы реттеушісі төлем мерзімі көп жағдайда жол апатына ұшыраған жүргізушіге байланысты екенін түсіндірді. Көбінесе олар апат болған жерден сапасыз суреттер мен видеолар жібереді, сақтандырушылар соғылу фактісін және келген шығын көлемін растайтын қосымша материал сұрауға мәжбүр болады. Пайда алушының сақтандырушыға дер кезінде жауап бермеген, көлікті келіскен мерзімде тексеруге әкелмеген немесе төлем алу үшін банк деректемелері туралы ақпарат беруді созып жүрген жағдайлар да бар.

Мамандардың айтуынша, биыл үш айда сақтандырушыларға 40 131 өтініш түсіп, 32 111 жағдайда сақтандыру төлемі жасалған.

Сақтандыру жағдайының жалпы санын еуропротоколмен рәсімделген жол апатымен салыстыру орынсыз. Еуропротокол машинаға келген зиян мөлшері 100 АЕК-тен аз болғанда және оқиғаға қатысушылар арасында кім кінәлі және кім жәбірленуші екенін анықтай алмай, дау шықпаған жағдайдағы жеңіл-желпі апат кезінде ғана қолданылады. Мұны тараптар жол полициясын шақырмай, мәселені сол жерде шешкен жол оқиғасымен салыстыруға болады. Агенттік өкілі мұндай жағдайда оқиғаға қатысушылар сақтандыру компаниясына хабарласпағандықтан, кінәлі тарап шығынды өзі төлегенін атап өтті.