Ескі Nissan Qashqai жаңарады

Nissan 2021 жылы әлемдік нарыққа арналған екінші буындағы Qashqai-ды қатардан шығарды, кейін үшінші буынын рестайлингтен өткізді. Ал бұрынғы Qashqai Қытайда жақсы өтіп жатыр, марка оны жақында жаңартады. Болашақ жаңа өнімнің суретін Қытай Өнеркәсіп министрлігі деректер базасында жариялады.

Модельдің екінші буыны Қытайда Qashqai Classic деп аталады, ал рестайлингтен кейін оның атауы Qashqai Glory деп өзгереді. Фотосуреттен кроссовердің «бет-бейнесі» толық жаңарғанын байқауға болады, ол үлкен Pathfinder сияқты жергілікті жаңа өнімдер стилінде жасалған.

Бұрын Қазақстанда танымал болған модель жаңа оптика, басқа бампер және жүріс шамы бар радиатор торы, сондай-ақ жаңа дөңгелек дискілер жинағымен ерекшеленеді. Өлшемі өзгеріссіз қалады.

1 / 5

• 
• 
• 
• 
• 

1 / 5

Интерьердің ресми суреті әлі шықпады, бірақ фотодан алдыңғы панельдегі бөлек тұрған үлкен дисплейді көруге болады. Qashqai Classic-те экран панельмен біріккен, демек машина салоны да үлкен өзгеріске ұшырайды.

Компания кроссовердің мотор гаммасын жаңартпайды. Ол вариатор және алдыңғы жетекпен жұмыс істейтін 140 ат күшіне ие 2 литрлік атмосфералы моторын сақтап қалады.

Nissan және Dongfeng бірлескен кәсіпорны жақында жаңарған модель өндірісін бастайды, олар бұрынғыдай бір модельдің екі буынын қатар сатады. Қазір ескі Qashqai Қытайда кем дегенде 125 900 юань (7.8 млн теңге) тұрады, бірақ түрлі жеңілдікке байланысты 2023 жылғы көліктің бағасы 97 900 юаньға (6 млн теңге) дейін төмендейді.

Қазақстанда екінші буындағы «Кашкай» саудасы 2022 жылдың аяғында, Санкт-Петербургтегі зауыттан келген автомобильдер таусылған кезде тоқтаған. Ресей-Украина қақтығысы басталған соң жапон маркасы Ресейдегі зауытын жапты. Nissan Қазақстан нарығына қайта оралуды жоспарлап отыр, бірақ қандай топтама ұсынатыны белгісіз.