1953 жылы Туриндегі автосалонда Италияның Iso компаниясы Isetta деп аталатын 2.3 метрлік кішкентай автомобильді таныстырды. Машинаға 9.5 ат күшіне ие мотоцикл қозғалтқышы орнатылған.
«Изетта» көпшілікке ұнады. Бірнеше жылдан кейін компания бұл көлікті Аргентина, Бразилия, Испания, Франция, Бельгия, Ұлыбритания және Германияда шығара бастады. Соңғы елде микромобильді BMW шығарды. Kolesa.kz сайтында италиялық машинаның неміс нұсқасы сатылып жатыр.
Жалғыз алдыңғы есік пен жиналмалы рөл секілді кейбір ұқсастықтарды ескермегенде, италиялық түпнұсқа Isetta мен BMW арасында айырмашылық көп. Тіпті екі машинаның бөлшектері бір-біріне ауыстыруға келмейді.
Германиялық Isetta 250-ге мотоциклге арналған 250 кубтық R25 моторы орнатылған. Ол 12 ат күшіне ие және 4 сатылы механикалық қораппен жұптасады.
Иесі кішкентай BMW-ның жағдайы туралы ақпарат берген жоқ. Хабарландыруда техниканың Алматыда екені және Қазақстанда кедендік рәсімдеуден өткені ғана айтылған. Фотосуреттерден Isetta 250-дің жақсы сақталғанын байқауға болады.
Мұндай микромобиль әлемде сирек кездеседі деуге келмейді. 1955 жылдан 1964 жылға дейін BMW оның 160 мыңнан астамын шығарды. Бірақ Қазақстанда 1962 жылғы осы үлгі жалғыз болуы мүмкін. Иесі оны 14 миллион теңгеге бағалап отыр.
Комментариев: 0