Машинаның каталитикалық конвертерін ұрлау бүкіл әлемге жалпыласқан қылмыс. Оның құрамында пайдаланылған газды бейтараптандыруда қолданылатын сирек кездесетін қымбат металдар бар. Айта кетерлігі, катализатор ұрлау әлемнің көп елінде ертеректе етек алған. Бірақ карантиндік шектеулер енгізіліп, көп кәсіпорын жабылғанда қылмыстың бұл түрі қайтадан кең тарады.
Біраз уақыт бұрын Қазақстанда катализаторды «заңды жолмен» шешіп алудың амалын тапқандар болды. Кейбіреулер жарнама сайттарында көлік иелеріне бөлшекті «ақысыз алып тастауды» ұсынды. Олар осы арқылы көлік құралының қуаты артып, тұтынуы азаяды деп сендірді. Тіпті машина иесіне аздап ақша ұсынғандар бар.
Елордалық бірнеше азамат осы бағалы затқа қол жеткізу үшін тәуекелге барған. Нұр-Сұлтан қалалық ПД баспасөз қызметінің хабарлауынша, қала тұрғыны үш досын пайдасы мен қаупі көп кәсіппен айналысуға көндіріпті.
Үш азамат ұрлыққа түнде кіріскен. Өздеріне керек катализатор мен оттегі датчиктерін алу оңай болу үшін асты биік кроссоверлерді нысанаға алған.
Ұрылар бейнебақылау камералары арқылы ұсталды. 19, 25 және 27 жастағы жігіттер кінәларын толығымен мойындаған. Олардың осыған ұқсас тағы үш қылмысқа қатысы бары дәлелденді. «Ұрлық» бабы бойынша қылмыстық іс қозғалып, күдіктілер уақытша ұстау изоляторына қамалды.
Комментариев: 0