Пандемия салдарынан екі қолға бір күрек таппай қалған азаматтардың көбеюі әлем бойынша көліктегі катализдік бейтараптандырғыш ұрлығының белең алуына түрткі болып отыр. Оның үстіне аталған бөлшек құрамындағы бағалы металдардың бағасы күннен күнге шарықтауда. Палладий соңғы жылда бес есе қымбаттады, қазір оның бір граммы 75 доллар тұрады. Родий өткен жылы 300 доллардан саудаланса, биыл 700 доллардан сатылып жатыр. Ол алтыннан 12 есе құнды.
The New York Times басылымы жергілікті полиция басқармасының кейінгі кездері аталған бөлшекті ұрлау деректерін тергеу ісімен жиі айналысып жүргенін жазды. Кейбір штаттарда мұндай қылмыс өткен жылмен салыстырғанда сегіз есе өсіпті. АҚШ-тағы темір қабылдағыштар оны 500 долларға сатып алатын көрінеді. Біздің елде де интернетте катализатор алу жөнінде хабарландыру көбейгені байқалады.
Көбіне қылмыскерлер гибрид Toyota Prius-ты көздейді. Бұл көліктегі катализатор тез алынады, әрі бағасы да кәдімгідей қымбат. Одан бөлек жол талғамайтын көліктер мен клиренсі жоғары кроссоверлер де қауіп аймағында, себебі ондай машинадан катализаторды оңай кесіп алуға болады.
Комментариев: 0