Құжатқа 2022 жылы 1 шілдеде қол қойылып, сол күні күшіне енді. ҚР СТ 3769-2022 жаңа стандартында «электросамокат» ұғымына түсініктеме берілді. Оған сай электросамокат — екі не үш дөңгелегі бар, электр қозғалтқышпен жүретін, орындығы жоқ, бір адам ғана тасымалдауға арналған, ең жоғары жылдамдығы сағатына 25 км-ден аспайтын электрлі жеке мобильділік құралы.
Жаңа стандартқа сай жылдамдығы 25 шақырымнан жоғары самокат Кедендік Одақтың «Дөңгелекті көлік құралдарының қауіпсіздігі туралы» Техникалық регламентіне бағынады әрі L санатына жатады. Ал сағатына 50 км-ден жоғары жылдамдықпен жүретін самокатты жүргізу үшін A1 санатындағы жүргізуші куәлігін алу қажет.
Электросамокатқа қойылатын техникалық талаптар мен пайдалану шарттары толық белгіленді.
Атап айтқанда, оларда:
- Кернеуі 100 В-тан жоғары емес тұрақты ток немесе кернеуі 240 В-тан жоғары емес айнымалы ток батареясынан қуат алатын электромотор орнатылады.
- Тұғыры, рөлі, екі немесе үш дөңгелегі, жарықтандыру құрылғысы (алдыңғы және артқы шамы), сигналы, тежеу жүйесі, басқару элементі болу керек.
- Ең жоғары жылдамдығы сағатына 25 км-ден, ал кері жүрген кезде немесе жаяу жүргінші режимінде жылдамдық 6 км-ден аспауға тиіс.
Стандартта ең жоғары жылдамдықты арттыру немесе белгіленген жылдамдық шегін алып тастау мақсатында электросамокаттың кез келген түйінін өзгертуге тыйым салынатыны жазылған.
Электросамокатта:
- Жүргізушінің ең ауыр салмағы, жүргізушінің ең жоғары және қажет болса, ең аласа бой биіктігі, жүргізушінің ең жоғары және ең төменгі жасы қосымша құжатта көрсетілуі керек.
- Жолаушы тасымалдауға, басқа көлік құралын (электросамокат, тіркеме, жартылай тіркеме) сүйреуге болмайды.
- Жүрген кезде жүргізуші тек түрегеп тұруы қажет.
Электросамокаттардың құрылымы мен жетек түрі бірдей болмағандықтан, стандартта олар екі негізгі түрге бөлінеді:
| № | Электросамокат түрі | Қозғалтқыш туралы ақпарат |
| 1 | Әр осьте бір дөңгелектен орнатылған екі осьті (екі дөңгелекті электросамокат) | Жетек алдыңғы/артқы дөңгелекте немесе екеуінде де |
| 2 | Бір осьте бір дөңгелек, екінші осьте екі дөңгелек орнатылған екі осьті (үш дөңгелекті электросамокат) | Жетек алдыңғы дөңгелекте/артқы осьте немесе екі осьте |
Бұған дейін ҚР ЖҚЕ мен Әкімшілік кодекске электросамокат енгізудің сәті түспеді, өйткені аталған жеке мобильділік құралы туралы ресми түсінік болған жоқ. Көп кешікпей жол ережесі мен Әкімшілік кодекске өзгеріс енетін секілді. Өйткені ҚР ІІМ биыл жыл басынан бері елімізде электросамокат қатысқан 40-тан аса жол апаты болғанын хабарлады. Оның бірінде кісі қайтыс болды. Оқыс оқиғаның көбі Алматыда тіркелген.
Комментариев: 0