Елдегі зауыттар биыл үш айда қанша көлік құрастырды

Наурызда Қазақстандағы автозауыттар 12 289 машина құрастырды, оның 11 264-і жеңіл автомобиль мен жеңіл коммерциялық техника, қалғаны жүк көлігі, автобус және өзге арнайы техникалар. Наурыздағы нәтиже былтырғы көрсеткіштен 17.6 % жоғары. Соның арқасында биыл I тоқсанда көрсеткіш 2024 жылғы сәйкес кезеңмен салыстырғанда 0.47 % өсті, атап айтқанда, былтыр — 33 021, биыл 33 176 машина шықты.

Автоөндірушілердің I тоқсандағы жалпы көрсеткішіне қаңтардағы нашар нәтиже әсер етті. Қазақстан автомобиль одағы (ҚАО) хабарлағандай, жылдың алғашқы айында өндіріс көлемі былтырғыдан 15.6 % кеміген. Ақпанда зауыттар 11 282 автомобиль жасады, бұл 2024 жылғы сәйкес кезеңмен салыстырғанда 3.2 % төмен.

ҚАО биыл автоөндіріс жақсы нәтиже көрсетеді деп сеніп отыр. Одақ президенті Анар Мақашеваның айтуынша қазіргі көрсеткіш отандық өндірушілер сапалы өнім шығарып, тұтынушы сеніміне ие болғанын көрсетеді. Сондай-ақ ол биыл елде тағы екі зауыт ашылатынын айтты. Оның бірі Алматыдағы Changan, Chery және Tank модельдерін шығаратын мультибренд зауыт, екіншісі Kia зауыты, кәріс маркасы Allur-ден жаңа орынға көшеді.

Allur қазір жергілікті зауыттар арасында көш бастап тұр. Онда үш айда 18 049 дана Chevrolet, Kia, Jetour, Hongqi, JAC және Škoda модельдері шықты. Бірақ зауыт көрсеткіші 2024 жылмен салыстырғанда 13.1 % төмен болды. Рейтингте екінші орында Алматыдағы Hyundai Trans Kazakhstan және Hyundai Trans Almaty зауыты тұр, олар 12 943 жеңіл автомобиль мен коммерциялық техника құрастырды. Бұл бір жыл бұрынғыдан 29.1 % жоғары.

Семейдегі СемАЗ бен Daewoo Bus Kazakhstan, Қарағандыдағы QazTehna, Көкшетаудағы КАМАЗ-Инжиниринг сияқты өзге кәсіпорындарда үш айда 2184&nbspмашина конвейерге тұрды.

Елдегі кәсіпорындар ең көп өндірген бес марка: Hyundai (12 806 дана), Chevrolet (7 657), Kia (5 609), Jetour (2 437) және Jac (1 696).

Модельдер арасында Chevrolet Cobalt (6 559 дана) көш бастап тұр. Одан кейін Hyundai Tucson (5 152), Kia Sportage (2 774), Hyundai Mufasa (2 134) және Hyundai Santa Fe (1 472) жайғасқан.