«Жыл басталғалы 2 мыңнан астам адам жол апатынан көз жұмып, 15 мың кісі жарақат алды. Ал қарашаның алғашқы он күнінде 300 жол апаты болған, салдарынан 60 тұрғын мерт болды, 400-ге жуық адам жараланған», — деді ҚР ІІМ ӘПК төрағасының орынбасары Жандос Мұратәлиев.
Биыл қыркүйекте ішкі істер министрі сегіз айда 1376 адам жан тапсырғанын және 11 584 кісі зардап шеккенін хабарлаған. Ал қазан айында тоғыз айға қорытынды жасаған бас прокуратура жол апаты 1700 адамның өмірін жалмап, 15 мың тұрғынның денсаулығына зиян келтіргенін атап өтті.
Демек екі айда 624 адам қаза тапқан. Демек күніне 10-15 азамат тізгінсіз техниканың құрбанына айналады. Бір жыл бұрын жағдай сәл де болса жақсы еді. 2021 жылы 2.3 мың адам ажал құшып, 1.8 мың тұрғын майып болды.
Суық түскелі жағдай тіпті ушығып кетті. ІІМ жүргізушілерді көлік дөңгелегін тездетіп ауыстыруға және жол ережесін сақтауға шақырады, сонымен қатар кілт тоқтаудан және қозғалысты асығыс бастаудан аулақ болған жөн.
Біраз уақыт бұрын Қазақстандағы апаттан қайтыс болғандардың көбеюі президентті шошытқан.
«Адам өмірін жалмайтын әр жол апатын төтенше жағдай ретінде қарастыру қажет. Адам өмірі аса құнды, сондықтан оның қауіпсіздігін сақтау бәрінен биік тұратын міндет болуға тиіс. Жол салу кезіндегі бармақ басты, көз қысты әрекетті түбімен жою үшін шара қолдану керек», — деді мемлекет басшысы.
Комментариев: 0