Ресей өнеркәсіп және сауда министрлігі 2030 жылға дейін утилизация алымын кезең-кезеңмен көтереді. Көршілес ел бұл шешім шетелдік компанияларды Ресейде жергілікті өндіріс орынын ашуға ынталандырады деп санайды. Өнеркәсіп және құрылыс министрінің орынбасары Олжас Сапарбеков Қазақстан осы жолды ұстана ма деген сұраққа жауап берді.
«Утиль алымға қатысты шағым ресми түрде түскен жоқ, бірақ біз „Тиктокта“ осы тақырыпқа қатысты наразылық барын байқап отырмыз. Бірақ оның қандай норма екенін нақты түсіну қажет», — деді
Вице-министрдің жағдайдан мүлде бейхабар екені сезіледі, себебі жазда eOtinish сайтында утиль алымы мен алғашқы тіркеу ақысын алып тастауды талап еткен петиция 50 мыңнан аса қол жинап, үкіметте қаралған. Жаз ортасында комиссия алымнан бас тартпайтынын айтты, өйткені бұл төлем экологиялық мәселені шешумен қатар, ішкі нарықты ескі көліктен қорғайтын және отандық өндірісті қолдайтын шаралардың бірі.
2025 жылы утиль алымы айлық есептік көрсеткіш (АЕК) өсуіне байланысты көтеріледі және қозғалтқыш көлемі 1000 текше см-ге дейінгі жеңіл автомобильді елге әкелу үшін кем дегенде 294 900 теңге төлеу қажет болады.
Комментариев: 0