ҚР денсаулық сақтау министрі Алексей Цойдың айтуынша, соңғы уақытта жедел жәрдем көмегіне жүгінетіндер саны Алматыда 1.8 есе, ал Нұр-Сұлтанда 2-2.5 есе өсті. Бұл аталған қызметке үлкен салмақ салып отыр.
«Қазіргі уақытта елде құрастырылған 807 жедел жәрдем көлігін алу бойынша келісімшарт жасалды. Сонымен қатар, өзге елдердің тәжірибесіне сүйеніп, медицинаға қатысы жоқ ұйымдарға тиесілі машиналарды тарта отырып, корона-такси енгізу қарастырылуда. Бұған қатысты ұсыныстар ведомствоаралық комиссияның қарауына жіберілді, олар қолдайды деп үміттенемін», — деп мәлімдеді министр.
Анықтама ретінде: қазір Ресей, АҚШ, Сингапур елдеріндегі кейбір қалаларда таксистер науқастарды тасымалдауға көмек беріп жатыр. Мысалы, Америкада Uber Health қызметінің іске қосылуы медицина автопаркінің жүктемесін 7%-ға азайтуға мүмкіндік берді.
Естеріңізге сала кетейік, жуырда президент ведомствоаралық комиссияға екі күн ішінде Қазақстанда қатаң карантин режимін қайта енгізу бойынша ұсыныстар әзірлеуді тапсырды. Денсаулық сақтау министрі елде төрт апталық ұлттық локдаун енгізу тиімді болады деген пікір білдірді.
Комментариев: 0