Үкіметпен видеожиналыс өткізген Қасым-Жомарт Тоқаев бірінші вице-премьер мен бірнеше әкімге халыққа коронавирус туралы дұрыс ақпарат бермегені үшін сөгіс жариялап, елде вирустың таралуымен байланысты шешімдер қабылдауда шұғыл әрі қатаң әрекет етпеген және олардың іске асырылуын қатаң қадағаламаған ведомствоаралық комиссияның жұмысын сынға алды.
«Пандемиямен күреске, әлеуметтік және экономикалық жағынан жағымсыз әсерлерді жоюға қатысты шешімдердің барлығын Премьер-министр жетекшілік ететін тиісті Мемлекеттік комиссия шеңберінде қабылдауды тапсырамын. Қазіргі эпидемиологиялық ахуалды реттеу үшін шұғыл шара қолдану мақсатында, Мемлекеттік комиссияға екі күн ішінде қатаң карантин енгізу бойынша ұсыныс әзірлеуді тапсырамын», — деп мәлімдеді ҚР президенті.
Сонымен қатар, Қасым-Жомарт Тоқаев үкіметті ұзаққа созылатын коронавирус пандемиясына қатысты шұғыл шара қабылдауға дайындықты бастауға шақырды. Соған байланысты қазақстандықтардың өмірі мен денсаулығын қорғау бойынша ұлттық жоспар әзірлеуге тапсырма берді.
Комментариев: 0