Елде автотасығыш және эвакуатормен көлік ұрлайтындар көбейді

Схема қарапайым: алаяқтар машинаны облыстар арасында жеткізіп беруді ұсынып, сайтта хабарландыру жариялайды немесе машинаны басқа қалаға жеткізу туралы хабарландыру берген көлік иесіне өздері хабарласады. Содан автомобиль автотасығышқа тиеледі де, із-түзсіз кетеді. Ал тасымалдаушы көрсеткен құжат жалған болып шығады.

Tengrinews.kz хабарлағандай, алаяқтар жақында Орал тұрғынының Avatr 11 электромобилі мен ақтаулық азаматтың Kia K5 седанын ұрлап кеткен. Бұдан бөлек Алматыда Lexus RZ, Volkswagen ID. 4, Zeekr 001 электрокарлары, Audi RS 5 спорткары және Mitsubishi Pajero II ұрланды. Биыл тамызда Алматыда Hyundai Pаlisade сатып алған Шымкент тұрғыны алаяқтар қақпанына түсті. Дәл сол күні тағы үш жаңа Hyundai Tucson қолды болыпты.

«Палисад» жоғалған соң полиция жылдам қимылдап, төрт адамды ұстады. Олар кінәсін мойындап, қылмысты ұйымдастырған адамды көрсетті. Бірақ кейін ұсталғандардың екеуі бостандыққа шыққан. Содан бері екі ай өтсе де, автомобиль әлі табылмапты. Полиция «жасырын тергеу жүріп жатқанын» ғана айтып отыр.

Ақтөбеде эвакуаторды пайдаланып көлік ұрлау фактісі тіркелді. Облыстық полиция департаменті хабарлағандай, жақында үй ауласында тұрған Mercedes-Benz Е-280-ді ұрлап кеткен. 32 жастағы ер адам седанды жалға алған эвакуатор көмегімен ұрлап, көлік бөлшектейтін жерге 120 мың теңгеге сатып жіберіпті.

Ақтөбе тұрғыны бөтен біреудің өртеніп кеткен Chevrolet Lacetti-інің шанағын металл қабылдайтындарға сатыпты. Ал тағы бір ақтөбелік азамат ескі бензин таситын көлікті утилизацияға өткізіп жіберген.