Елде автотасығышпен көлік ұрлайтындар көбейді

Шамамен бір апта бұрын Zeekr ұрланғаны туралы ақпарат тараған. Иелері көлікті Алматыдан Өскеменге алдырмақ болып, алаяқтарға ұрынған-ды. Автотасымалдаушы қос 001-ді қабылдап алып, келіскен жерге жеткізудің орнына көлікті тығып, ақша бопсалапты. Оқиғаның соңы жақсы аяқталған, бірақ осыған ұқсас тағы бірнеше жайт болды.

Instagram-дағы incubuskz парақшасында екі есікті Audi RS5 ұрланды деген жазба жарияланды. Автордың сөзінше иесі купені Қарағандыға жеткізбек болып, автотасушы жалдаған. Тасымалдаушы барлық қажет құжатты көрсетіп, тіпті Audi-ді тиейтін жерге эвакуатормен жеткізіп бермек болған. Бірақ машина Қарағандыға емес, Қырғызстанға қарай жол тартты. Арада бір күн өткенде қылмыскер хабарласып, «ауди» қайда тұрғанын айтқаны үшін криптовалюта талап еткен.

— Көлігім табылады деп ойламаймын…осы жазбамды автотасушы және басқа да эвакуатор қызметін пайдаланатындар көреді деп сенемін. Тексеріңіз. Тасымалдаушымен міндетті түрде жүзбе-жүз кездесіңіз. Бұлай болмаған жағдайда сан соғып қалуыңыз ықтимал, — деп жазба авторы жүргізушілерді сақтануға шақырды.

Жазба астындағы пікірлер арасынан осыған ұқсас тағы бір оқиға көзге түсті. Бірақ бұл жағдайда жаңа электромобиль немесе қымбат суперкар емес, тозығы жеткен жол талғамайтын Pajero қолды болыпты. Машина автотасығышқа тиеліп, артынша жоғалып кеткен. Жалған нөмір тағып, техпаспорты өзгерген Паджерик Өскеменнен табылды. Қылмыскер Mitsubishi-ді Алматыда 1.2 млн теңгеге сатыпты, ал Шығыс Қазақстанға оны жаңа иесі айдап барған.